ფიბაევროპის თასი: ქუთაისი 2010 სლოვაკეთში დამარცხდა
ფიბა-ევროპის 2024-25 წლების გათამაშების პირველ ტურში საქართველოს ჩემპიონმა „ქუთაისი 2010“-მა სლოვაკეთში „პრევიძას“ წინააღმდეგ ითამაშა და 69:77 დამარცხდა.
კოტე ტუღუშის გაწვრთნილმა გუნდმა დღევანდელი შეხვედრა ლეგიონერების გარეშე ითამაშა და დიდი შესვენების წინ 3 ქულით იგებდნენ კიდეც, თუმცა მასპინძლებმა თამაში მესამე მეოთხედიდან შემოაბრუნეს.
გარდამტეხი მესამე მეოთხედი იყო, რომელიც „პრევიძამ“ 24:12 მოიგო.
„ქუთაისის“ რიგებში საუკეთესო გიორგი კორსანტია იყო, რომელმაც 24 ქულა და 11 მოხსნა მიითვალა. 18 ქულა და 5 მოხსნა ჰქონდა აკაკი დვალიშვილს.
მეტოქის რიგებში საუკეთესო ჰანტერ დინი იყო, რომელმაც 16 მოხსნა და 12 ქულა გაიფორმა.
კოტე ტუღუშის გუნდი მომდევნო შეხვედრას 16 ოქტომბერს „ბილბაოს“ წინააღმდეგ თბილისში გამართავს.