ლუკას პაკეტას სამუდამო დისკვალიფიკაცია ემუქრება

ბრაზილიის ნაკრებისა და „ვესტ ჰემის“ ნახევარმცველი ლუკას პაკეტა შესაძლოა სამუდამოდ ჩამოაშორონ ფეხბურთს - Daily Mail-ის ცნობით, მიზეზი ფეხბურთელისა და მისი მეგობრების მიერ გაკეთებული ფსონები გახდა.

გამოცემის წყაროს ცნობით, პაკეტას ბრალად ედება, რომ მან განზრახ მიიღო სულ მცირე 4 ყვითელი ბარათი, რათა გავლენა მოეხდინა ფსონების ბაზარზე.

არსებული ინფორმაციით, 60-მდე ადამიანმა ბრაზილიაში სხვადასხვა ოდენობის თანხა დადო იმ ფსონზე, რომ აღნიშნულ მატჩებში პაკეტა ყვითელ ბარათებს მიიღებდა, მათ მიერ მოგებულმა თანხამ კი 100 000 გირვანქა სტერლინგი შეადგინა.

Daily Mail-ის ცნობით, პაკეტა ყველა ბრალდებას უარყოფს და თავისი სიმართლის დამტკიცებას სასამართლოში გეგმავს.
საქმეზე სასამართლო სხდომა 2025 წლის მარტში არის ჩანიშნული.

ინგლისის საფეხბურთო ასოციაცია (FA) პაკეტას მოედანზე განზრახ ჩადენილი ქმედებების ოთხ ეპიზოდში ადანაშაულებს.