მიქაუტაძე თადარიგში დარჩა - ლიონმა რეინჯერსი გაანადგურა

ევროპა ლიგის მე-2 ტურის შეხვედრაში გიორგი მიქაუტაძის „ლიონი“ გლაზგოში „რეინჯერსს“ ესტუმრა და დამაჯერებლად 4:1 დაამარცხა.

მატჩი სანახაობრივი გამოდგა. გუნდებმა ერთმანეთის კარისკენ 30-ჯერ, ხოლო ზუსტად ჯამში 13-ჯერ დაარტყეს.

მასპინძლების მხრიდან საწყის წუთებზე დიდი უპირატესობის მიუხედავად ანგარიში მე-10 წუთზე „ლიონმა“ გახსნა. შერკის ბრწყინვალე თამაშის შედეგად ფოფანამ ზუსტად დაარტყა.

„რეინჯერსმა“ მე-14 წუთზე ლოურენსის გოლით გაათანაბრა, თუმცა მე-19 წუთზე ლაკაზეტის გოლით „ლიონი“ კვლავ წინ გავიდა. ტაიმის მიწურულს კი 46-ე წუთზე ლაკაზეტმა დუბლი გაიფორმა, მაგრამ ამჯერად მისი გოლი ნამდვილი შედევრი იყო - შორეული გასროლა პირდაპირ ცხრიანში.

55-ე წუთზე შერკის პასის შემდეგ ფოფანამ შეხვედრას წერტილი დაუსვა და ტაბლოზე 4:1 დააფიქსირა.

გიორგი მიქაუტაძე მთელი შეხვედრა თადარიგში იმყოფებოდა და მოედანზე არ გამოჩენილა. უნდა აღინიშნოს, რომ „ლიონმა“ 4-3-3-ით ითამაშა და გუნდის სამივე შემტევი - შერკი, ფოფანა, ლაკაზეტი ძალიან შეთამაშებულად და დამაჯერებლად გამოიყურებოდა. ეს ფაქტი ქართველი ფორვარდის სამომავლო შანსებზე კარგად ნამდვილად არ მეტყველებს.

„ლიონი“ ევროპა ლიგაზე თავის მომდევნო შეხვედრას 24 ოქტომბერს საკუთარ მოედანზე „ბეშიქთაშის“ წინააღმდეგ გამართავს.