მესის 46-ე ტიტული - ინტერ მაიამი რეგულარულის გამარჯვებულია
„ინტერ მაიამი“ ამერიკის შეერთებული შტატების საფეხბურთო ჩემპიონატის რეგულარული გათამაშების გამარჯვებული მის დასრულებამდე ორი ტურით ადრე გახდა. Supporters’ Shield-ის ჯილდოს ტურნირის ორგანიზატორები ყოველწლიურად ცალკე იმ გუნდს გადასცემენ, რომელიც წრიული სისტემის შედეგად ყველაზე მეტ ქულას დააგროვებს. უშუალო კონკურენტის, „კოლამბუს-ქრიუს“ ძლევის შემდეგ კი, ფლორიდელების აქტივში 68 ქულა აღმოჩნდა და ცხადი გახდა, რომ პირველ ადგილს აღარავის დაუთმობდნენ.
ტატა მარტინოს მომზადებულმა გუნდმა კოლამბუსელები, რომელიც საკმაოდ ძლიერი კლუბია და როგორც ლიგების, ასევე MLS-ის თასის მოქმედი მფლობელია, 3:2 დაამარცხეს და სამივე გოლი ყოფილი „ბარსელონელების“ ანგარიშზეა. პირველი ნახევარი მაიამელებმა ლიონელ მესის დუბლით მოიგეს, რასაც მეორე ტაიმის დასაწყისში როსიმ ერთი ბურთის გაქვითვით უპასუხა, თუმცა ზუსტად ორ წუთში ლუის სუარესმა სტატუს-ქვო აღადგინა და ერნანდესის ზუსტ 11-მეტრიანს არანაირი მნიშვნელობა აღარ ჰქონია.
რეგულარული პირველობის დარჩენილ ორ ტურში „ინტერ მაიამი“ სტუმრად „ტორონტოს“ და საკუთარ მოედანზე „ნიუ ინგლენდს“ შეხვდება.აქვე გეტყვით, რომ ეს მესისთვის კარიერაში რიგით 46-ე ჯილდოა და ამ მხრივ ფეხბურთის ისტორიაში ლიდერობა კიდევ უფრო გაიმყარა.
რაც შეეხება MLS-ის ბომბარდირთა დავას, სუარესის ანგარიშზე 18, ხოლო „ელ მონგოლიკოს“ აქტივში 17 გოლია და ლიდერ კრისტიან ბენტეკეს (21), რომელიც DC იუნაიტედის ღირსებას იცავს, პირველი პოზიციის შესანარჩუნებლად დიდი ოფლისღვრა მოუწევს.
