ვიეირა ლობჟანიძის ატლანტაში? | მოლაპარაკებები უკვე მიმდინარეობს

გამოცემა GIVEMESPORT-ის ინფორმაციით, „ატლანტა იუნაიტედს“, რომლის ღირსებასაც საქართველოს ნაკრების შემტევი, საბა ლობჟანიძე იცავს, დიდი ალბათობით საფრანგეთის ნაკრებისა და ლონდონის „არსენალის“ ლეგენდა, პატრიკ ვიეირა გაწვრთნის.

ბოლოს 48 წლის ვიეირა ლიგა 1-ის „სტრასბურში“ მუშაობდა, მაგრამ ორმხრივი შეთანხმების საფუძველზე კლუბი ერთი სეზონის შემდეგ დატოვა. ვიეირას ხელმძღვანელობით „სტრასბურმა“ სეზონი მე-13 პოზიციაზე დაასრულა. მანამდე ვიეირას უმუშავია „კრისტალ პალასში“ და „ნიცაში“, ხოლო სამწვრთნელო კარიერა ფრანგმა სპეციალისტმა სწორედ მლს-ში, „ნიუ იორკ სიტიში“ დაიწყო.

მედიაში ასევე იწერებოდა, რომ ვიეირას კანდიდატურა აშშ-ის ნაკრების თავკაცის პოსტზე განიხილებოდა, თუმცა საბოლოოდ ამერიკული ფეხბურთის მესვეურებმა მაურისიო პოჩეტინოზე შეაჩერეს არჩევანი.

Yahoo! Sports-ის ცნობით, „ატლანტასა“ და პატრიკ ვიეირას შორის მოლაპარაკებები გასულ თვეში გაიმართა. ამჟამად ვიეირა „ატლანტაში“ დანიშვნის მთავარი კანდიდატია. 

საბა ლობჟანიძის გუნდში გარდამავალი პერიოდია - ზაფხულში თანამდებობები დატოვეს მთავარმა მწვრთნელმა, გონსალო პინედამ და ტექნიკურმა დირექტორმა, კარლოს ბოკანეგრამ.

ზაფხულშივე კლუბი დატოვეს წამყვანმა ფეხბურთელებმა - ტიაგო ალმადამ, გიორგოს გიაკუმაკისმა და კალებ უაილიმ. ატლანტამ ცოტა ხნის წინ დაიმატა რუსეთის ნაკრების ფეხბურთელი ალექსეი მირანჩუკი, ხოლო კიდევ ორი „ვარსკვლავური“ ფეხბურთელის კვოტა ამჟამად თავისუფალია.