გამარჯვება აუტსაიდერთან - დილა ლიდერობას ინარჩუნებს

Crystalbet ეროვნული საფეხბურთო ლიგის XXV ტური თენგიზ ბურჯანაძეზე გამართული შეხვედრით გაიხსნა, სადაც გათამაშების ლიდერმა „დილამ“ აუტსაიდერი „სამტრედია“ 3:2 დაამარცხა და 3-მატჩიანი მოუგებელი სერია დაასრულა. სამტრედიელებმა კი 4-მატჩიანი წაუგებელი სერია შეწყვიტეს და დარჩნენ მიმდინარე ჩემპიონატში ერთადერთ კლუბად, რომელსაც სტუმრად თამაში არ მოუგია.

სამტრედიელები უსწრაფესი გოლით დაწინაურდნენ - 35-ე წამზე აბუბაქარ კონტემ მეკარესთვის ბურთის დაბრუნების დროს შეცდომა დაუშვა, რითაც დანიელ ოვუსუმ ისარგებლა და ნიკა ქავთარაძის კარი აიღო. თუმცა, მასპინძლებმა პირველ ტაიმში არამხოლოდ წონასწორობა აღადგინეს, არამედ შესვენებაზე დაწინაურებულებიც გავიდნენ და 2-წუთიან ინტერვალში იმერლების კარში ამდენივე გოლი გაიტანეს. ჯერ ნოდარ ლომინაძის წაქცევისთვის დანიშნული 11-მეტრიანი ზუსტად ალექსანდრე ანდრონიკაშვილმა შეასრულა, ხოლო შემდეგ იბრაჰიმა დრამეს გადაცემა ტაირელ ვაუტერმა გამოიყენა და მიმდინარე ჩემპიონატში მე-13 გოლი გაიტანა.

მეორე ნახევარში კიდევ ორი ბურთი გავიდა - 88-ე წუთზე მუსა ბაბა სანგარემ სხვაობა ორ ბურთამდე გაზარდა, ხოლო საბოლოო ანგარიში არბიტრის მიერ კომპენსირებულ დროში „დილას“ ანგოლელი ლეგიონერის, ანტონიო ლოპეშის ავტოგოლის შედეგად დაფიქსირდა.