საბამ მესის გუნდს ისევ გაუტანა | ატლანტა მაიამის დაუზავდა
MLS-ის მორიგ ტურში საბა ლობჟანიძის „ატლანტამ“ საკუთარ მოედანზე ლიონელ მესის, სერხიო ბუსკეტსის, ჟორდი ალბასა და ლუის სუარესის „ინტერ მაიამი“ მიიღო.
ანგარიში 29-ე წუთზე სტუმრებმა გახსნეს - „მაიამი“ წინ დავიდ რუისმა გაიყვანა, 56-ე წუთზე კი ანგარიში საბა ლობჟანიძემ გაათანაბრა. საქართველოს ნაკრების შემტევმა საჯარიმოში პოზიცია სწორად შეარჩია და პედრო ამადორის პასის შემდეგ თავური დარტყმით ბურთი „მაიამის“ მეკარეს ფეხებს შორის გაუძვრინა.
საბას გოლი „მაიამის“ კარში:
მალევე სტუმრები ლეონარდო კამპანიას გოლით ისევ დაწინაურდნენ, თუმცა მატჩის მიწურულს „ატლანტას“ ახალწვეულმა, ალექსეი მირანჩუკმა ლამაზი შორეული დარტყმით საბოლოო ანგარიში დააფიქსირა - 2:2.
რაც შეეხება მესის, ის მოედანზე 61-ე წუთზე გამოვიდა, ალბა - 67-ე წუთზე, ხოლო სუარესი - მე-80 წუთზე. სერხიო ბუსკეტსი კი მწვრთნელმა დაასვენა - „ინტერ მაიამის“ პლეიოფის საგზური უკვე მოპოვებული აქვს.
30 მატჩის შემდეგ „ატლანტა“ MLS-ის აღმოსავლეთ კონფერენციის სატურნირო ცხრილის მე-11 პოზიციაზეა. ლობჟანიძის გუნდს პლეიოფის ზონისგან 1 ქულა აშორებს. მომდევნო მატჩს „ატლანტა“ 22 სექტემბერს „ნიუ იორკ რედ ბულსის“ წინააღმდეგ გამართავს.
მატჩის საუკეთესო მომენტები:
