ვინ გახდება თანალიდერი - დილამ ქულები ისევ დაკარგა

Crystalbet ეროვნული საფეხბურთო ლიგის 24-ე ტურში გათამაშების ერთპიროვნულმა ლიდერმა „დილამ“ ქულები კიდევ ერთხელ დაკარგა, რამაც ოთხშაბათს, 18 სექტემბერს გასამართ „ტორპედო“ – „იბერიას“ შეხვედრას კიდევ უფრო მეტი სატურნირო დატვირთვა გაუჩინა. ჯერჯერობით დაუზუსტებული მიზეზების გამო, თბილისის „დინამომ“ გორელებს არა „დინამო არენაზე“, არამედ დავით პეტრიაშვილის სახელობის სტადიონზე უმასპინძლა და შეხვედრაში ანგარიში საკმაოდ გვიან, 83-ე წუთზე გაიხსნა, როდესაც მასპინძლები კაპიტანმა ალექსანდრე კალანდაძემ ნოსა ედოკპოლორის აქტიურობის შედეგად დააწინაურა. თითქოს ქვეყნის 19-გზის ჩემპიონის ნანატრ გამარჯვებას საფრთხე აღარ უნდა დამუქრებოდა, მაგრამ 88-ე წუთზე ედოკპოლორმა თავისი გუნდი დააღალატა, შოთა შეყილაძე წააქცია და დანიშნული 11-მეტრიანი „დილას“ საუკეთესო ბომბარდირმა ტაირელ ვაუტერმა ზუსტად შეასრულა.

გათამაშების სატურნირო ცხრილს 48 ქულით „დილა“ ლიდერობს და მეორე-მესამე ადგილებზე მყოფ „იბერიასა“ და „ტორპედოს“ 3 ქულით უსწრებს. როგორც უკვე მოგახსენეთ, ოთხშაბათს, ქუთაისში „შენგელია არენაზე“ სწორედ ეს გუნდები ითამაშებენ და ვინც გაიმარჯვებს, გორის კლუბთან ერთად Crystalbet ეროვნული ლიგის თანალიდერი გახდება.