„პრობლემა ბევრია, ნეტა, მხოლოდ ერთი იყოს...“ - ქეცბაია კოსოვოსთან განადგურების შემდეგ

უეფას ერთა ლიგის C დივიზიონის მეორე ტურში, თემურ ქეცბაიას გაწვრთნილი კვიპროსის ნაკრები საკუთარ მოედანზე კოსოვოს დაუპირისპირდა და გამანადგურებელი ანგარიშით, 4:0 დამარცხდა.

შეხვედრის დასრულების შემდეგ კვიპროსელთა ქართველმა დამრიგებელმა მარცხი შეაფასა და გუნდში არსებულ პრობლემებზე ისაუბრა.

რა თქვა ქეცბაიამ:

„არ ვართ მზად, რომ ასეთ მოკლე დროში ორი ასეთი დონის მატჩი ჩავატაროთ. მკვდრები ვიყავით, დაღლილები და თავიდანვე ყველაფერი დასრულებული იყო. ასე მოხდება, როდესაც ასეთი დონის გუნდთან ასე თამაშობ. რას უნდა ველოდოთ, როდესაც კვიპროსელი ფეხბურთელები კვიპროსის ჩემპიონატშიც ვერ თამაშობენ? ასევე, მნიშვნელოვანი ფეხბურთელებიც გვაკლდნენ, მაგრამ მათგან, ვინც თამაშობდა, ბევრად მეტს ველოდი“.

„შედეგით და იმ იმიჯით, რომელიც ახლა შეგვექმნა, საკმაოდ იმედგაცრუებული ვარ. როდესაც ასეთ შეცდომებს უშვებ, მარცხისგან დაზღვეული არ ხარ. პრობლემამ კი სწორედ იმ პერიოდში იჩინა თავი, როდესაც ჩემპიონატები და სეზონი დაიწყო“.

„ჩვენ არ გვქონია სიახლე, არ ვყოფილვართ ის, ვინც უნდა ვიყოთ. პრობლემა ერთი არ არის, ბევრია და ვისურვებდი, რომ მხოლოდ ერთი იყოს. დღევანდელ ფეხბურთში, ორ დღეში სამი თამაშის სათამაშოდ უნდა იყო მზად, წინააღმდეგ შემთხვევაში ასეთი შედეგი დადგება“.

„ნაკრებს ყოველთვის აქვს მომავალი. ყოველთვის გამოჩნდება ფეხბურთელთა ნაკადი, რომელიც უკეთ ათამაშდება. ჯერჯერობით, ვერაფერს მივაღწიეთ, მაგრამ ნაკრებში დავინიშნებოდი, გუნდს წარმატება არ ჰქონია. ახლა რაღაც შედეგზე გავედით. ლიეტუვასთან გამარჯვება შემთხვევითი არ ყოფილა. არ მგონია, რომ წარსულის წარუმატებლობა გამეორდეს“.

2 ტურის შემდეგ, კვიპროსის ნაკრებს ერთა ლიგის C ლიგის მეორე ჯგუფში 3 ქულა აქვს და მესამე პოზიციაზე იმყოფება. თემურ ქეცბაიას გუნდი მომდევნო შეხვედრას 12 ოქტომბერს, საკუთარ მოედანზე რუმინეთის ნაკრების წინააღმდეგ გამართავს.