სუარესის მორიგი დუბლი - ინტერ მაიამიმ ჩიკაგოს გადაურბინა
MLS-ის მორიგ ტურში ინტერ მაიამი ჩიკაგოს ესტუმრა და 4:1 გაანადგურა. აღნიშნულ გამარჯვებაში დიდი წვლილი ლუის სუარესმა შეიტანა, რომელმაც დუბლი შეასრულა.
ვეტერანი ურუგვაელი დიდებულ ფორმაშია. გასულ ტურში მან ასევე დუბლი შეასრულა. ლუისს ამერიკის ჩემპიონატში ვერ აჩერებენ.
ბარსას ყოფილმა ფეხბურთელმა ჩიკაგოს კარი 46-ე და 65-ე წუთებზე აიღო. 37 წლის თავდამსხმელს ინტერ მაიამის შემადგენლობაში უკვე 18 გოლი და 8 საგოლე გადაცემა დაუგროვდა.
დევიდ ბექჰემის გუნდი აღმოსავლეთ კონფერენციას 59 ქულით ლიდერობს და მეორე ადგილზე მყოფ ცინცინატის 8 ქულით უსწრებს.
შემდეგ ტურში ინტერ მაიამი ფილადელფიას დაუპირისპირდება. აღნიშნულ მატჩში ლიონელ მესის დაბრუნება იგეგმება, რომელმაც კოპა ამერიკაზე ტრავმა მიიღო და მას შემდეგ ფეხბურთი აღარ უთამაშია.
