“ნელ-ნელა პრობლემები მოგვარდება“ - ანჩელოტი ბეტისთან მატჩის წინ

ლა ლიგის მორიგ ტურში მადრიდის რეალი ბეტისს უმასპინძლებს. მატჩის წინ, სამეფო კლუბის მთავარმა მწვრთნელმა კარლო ანჩელოტიმ ჟურნალისტებთან ისაუბრა.

ანჩელოტი:

„ვფიქრობ გულშემატკივრები დაგვეხმარებიან. ლას პალმასთან რთული მატჩის შემდეგ, გვინდა, რომ სოლიდურად ვითამაშოთ და ყველა გავახაროთ. ჩემი აზრით, მადრიდის რეალს ამისი მოტივაცია აქვს. კოლექტიური მუშაობა უნდა გავაუმჯობესოთ. გუნდს ვესაუბრე და ყველა ასე ფიქრობს.

თავი უკეთესად უნდა დავიცვათ. სტატისტიკის მიხედვით, ბევრი გოლი არ გაგვიშვია, მაგრამ ბურთის დაბრუნების დროს ვწვალობთ. ნელ-ნელა პრობლემები მოგვარდება. მიუხედავად იმისა, რომ მბაპეს გოლი არ გაუტანია, ის კარგად თამაშობს. არის მცირე ადაპტაციის პრობლემა. შემტევები დაცვას უფრო აქტიურად უნდა ეხმარებოდნენ.

გვაკრიტიკებენ და ეს ნორმალურია, მაგრამ ამაზე არ ვღელავთ. ვინისიუსი და მბაპე სულ მალე უკეთესად გაუგებენ ერთმანეთს. ისინი პროფესიონალები არიან. მათ პოზიციების შეცვლა შეუძლიათ, მაგრამ მარცხენა ფლანგზე უფრო მეტ დროს ვინისიუსი გაატარებს.“

შეგახსენებთ, რომ მადრიდის რეალმა ლა ლიგა ცუდად დაიწყო. 3 მატჩიდან მხოლოდ 1 მოიგო და 2 ფრედ დაასრულა. კილიან მბაპეს კი ჯერჯერობით გოლი არ აქვს გატანილი.

ცნობისთვის, სამეფო კლუბისა და ბეტისის დაპირისპირება პირველი სექტემბრით თარიღდება და თბილისის დროით 23:30-დან დაიწყება.