„ამაზე დიდი სიხარული არ არსებობს“ - ნაკრების დებიუტანტის პირველი კომენტარი

7 სექტემბერს თბილისში ჩეხეთთან და 10 სექტემბერს ტირანაში ალბანეთთან გასამართი უეფას ერთა ლიგის მატჩებისთვის საქართველოს ეროვნული ნაკრების მთავარმა მწვრთნელმა ვილი სანიოლმა 23 ფეხბურთელი გამოიძახა, რომელთა შორისაც ლუკა გადრანისა და შოთა ნონიკაშვილის სახით ორი დებიუტანტია. ეს უკანასკნელი რამდენიმე კვირის წინ „იბერიადან“ უკრაინის „ჩერკასში“ გადავიდა და მის საკლუბო წინსვლას სანაკრებო წარმატებაც თან დაერთო. რამდენად ემოციური იყო შოთასთვის საქართველოს ეროვნულ გუნდში გამოძახება, ამის თაობაზე ნონიკაშვილმა Crystalsport-თან ინტერვიუში ისაუბრა.

შოთა ნონიკაშვილი

ვარჯიშიდან სახლში რომ დავბრუნდი, ზურაბ ხიზანიშვილის გამოტოვებული ზარი დამხვდა. მაშინვე დავურეკე და ნაკრებში გამოძახების ამბავი შემატყობინა. სიტყვებით არ შემიძლია იმის აღწერა, რაც იმ მომენტში ჩემს თავს ხდებოდა. ამაზე დიდი ემოცია და ამაზე დიდი სიხარული უბრალოდ არ არსებობს.

ჩემი მთავარი მიზანი შეიძლება ითქვას, რომ სანახევროდ შესრულებულია, რადგან ყოველთვის საქართველოს ნაკრებში თამაშზე ვოცნებობდი. თუმცა, მიზანი მთლიანად რომ შესრულდეს, ჩემზე გაცემული ავანსები და ის ნდობა უნდა გავამართლო, რომელიც გამომიცხადეს.

როგორ მოხდა „ჩერკასში“ ჩემი ტრანსფერი? „ბაშაქშეჰირთან“ კონფერენს ლიგის მატჩების დასრულების შემდეგ შემატყობინეს, რომ ინტერესი სერიოზული იყო. თანაც, უკრაინულ გუნდს როგორც იცით ანდრეს კარასკო ამზადებს, რომელსაც ბავშვობიდან კარგად ვიცნობ და ჩემი შესაძლებლობების შესახებ ძალიან კარგად იცის.

უკრაინისა და საქართველოს ჩემპიონატებს შორის, ფეხბურთელების ხარისხს თუ მივიღებთ მხედველობაში, დიდი სხვაობა არ არის. ბევრს რომ არაფრით ჩამოვუვარდებით, ეს ევროპის ჩემპიონატზეც კარგად დამტკიცდა.

რაც შეეხება „ჩერკასს“, ძლიერი გუნდია, რომელმაც ოთხ ტურში სამი თამაში მოიგო და სატურნირო ცხრილში მეორე ადგილზეა. მეც წინა შეხვედრაში ვითამაშე და ახალ კლუბს ნელ-ნელა ვეგუები.

შოთა ნონიკაშვილი „იბერიას“ საფეხბურთო სკოლის აღზრდილია და წლევანდელ სეზონში ის ამ გუნდს ერთ-ერთი წამყვანი ფეხბურთელი გახლდათ. მიმდინარე Crystalbet ლიგაში 23 წლის ნახევარმცველმა 17 მატჩი ჩაატარა და თავი 8 გოლთან ერთად, 1 საგოლე პასითაც გამოიჩინა.