მექვაბიშვილის მძიმე ტრავმა - კრაიოვამ ქართველი ლიდერი დაკარგა

ანზორ მექვაბიშვილმა რუმინეთის საფეხბურთო ჩემპიონატის მე-7 ტურის შეხვედრაში მუხლის ჯვარედინი მყესების ტრავმა მიიღო, რის გამოც „კრაიოვას“ რამდენიმე თვის განმავლობაში ვერ დაეხმარება. 23 წლის ნახევარმცველმა ძლიერი ტკივილები ბუქარესტის „დინამოსთან“ (1:2) გამართული მატჩის მეორე ტაიმის დასაწყისში იგრძნო, რის შემდეგაც ის 49-ე წუთზე შეცვალეს.

ცნობილმა რუმინულმა გამოცემამ, Fanatic.ro-მმა უკვე გამოაქვეყნა კლუბის ხელმძღვანელების განცხადება, სადაც წერია, რომ პირველადი გამოკვლევების შედეგად, მექვაბიშვილს მყესების გაწყვეტა დაუდგინდა, რის გამოც სრულიად შესაძლებელია ოპერაციის გაკეთება დასჭირდეს და არამხოლოდ რამდენიმე თვით უქმობა მოუწიოს, არამედ წლევანდელ სეზონში თანაგუნდელების დახმარება ვეღარ შეძლოს. ქართველი გულშემატკივრისთვის სასიამოვნო ამ ისტორიაში მხოლოდ ის არის, რომ რუმინული გამოცემები საქართველოს ნაკრების წევრს „უნივერსიტატ კრაიოვას“ ნახევარდაცვის საკვანძო ფიგურად და წამყვან მოთამაშედ ასახელებენ, რის გამოც მისი შემცვლელის დამატების აუცილებლობაზეც წერენ, რადგან თვლიან, რომ ანზორის კლასის მოთამაშის გამოკლება შუა ხაზის ასპარეზობას საგრძნობლად დაასუსტებს.

მექვაბიშვილი „კრაიოვას“ ღირსებას 2024 წლის ზამთრიდან იცავს, ხოლო ერთი კვირის წინ „გლორია ბუზაუს“ წინააღმდეგ გამართულ შეხვედრაში, რუმინეთის პირველობაზე სადებიუტო ბურთი გაიტანა.