ქართული კლასიკო ტორპედომ მოიგო - დილასთან სხვაობა 3 ქულამდე შემცირდა

Crystalbet ეროვნული საფეხბურთო ლიგის 21-ე ტურის ცენტრალურ შეხვედრას წინ დიდი აფიშა უძღვოდა - გუშინ, უშუალო კონკურენტისა და გათამაშების ლიდერის, „დილას“ ქულების კიდევ ერთხელ დაკარგვამ „ტორპედოს“ არაჩვეულებრივი შანსი გაუჩინა - „ქართულ კლასიკოში“ „დინამოს“ დამარცხების შემთხვევაში ისინი გორელებთან სხვაობას სამ ქულამდე შეამცირებდნენ და თანაც ქართლელებთან შედარებით, მათ ერთი მატჩით ნაკლები აქვთ გამართული.

ანგარიში 29-ე წუთზე გაიხსნა - „დინამო“ რამდენიმეწლიანი პაუზის შემდეგ მშობლიურ კლუბში დაბრუნებულმა ნიკა ნინუამ დააწინაურა, რომელმაც საჯარიმოს გარედან დარტყმით აიღო სტუმართა კარი. თუმცა, ქვეყნის 19-გზის ჩემპიონმა პირველ ნახევარში არათუ უპირატესობა ვერ შეინარჩუნა, არამედ შესვენებაზე დამარცხებული გავიდა - შვიწუთიან მონაკვეთში, 35-ე და 42-ე წუთებზე გატანილი ბურთებით, „ტორპედოს“ 27 წლის გვინეელმა ფორვარდმა მომო იანსანემ დუბლი შეასრულა.

მეორე ნახევარი ორმხრივი იერიშებით წარიმართა. 63-ე წუთზე კი თბილისური კლუბის ავსტრიელმა მთავარმა მწვრთნელმა ფერდინანდ ფელდჰოფერმა თამაშის გამოცოცხლება სამმაგი ცვლილებით სცადა - მინდორზე თორნიკე ოქრიაშვილი, საბა სამუშია და ნიკა ცეცხლაძე შევიდნენ. მატჩის დასრულებამდე ორიოდე წუთით ადრე წონასწორობის აღდგენა სწორედ ოქრიაშვილს შეეძლო, თუმცა 11-მეტრიანი ვერ გამოიყენა და  ქუთაისელებმა უმნიშვნელოვანესი თამაში 1:2 მოიგეს.

„დინამო არენაზე“ მოპოვებული გამარჯვებით „ტორპედომ“ 41 ქულა  დააგროვა და ლიდერ „დილასთან“ სხვაობა სამ ქულამდე შეამცირა. რაც შეეხება „დინამო თბილისს“, ჩვენი ქვეყნის ყველაზე ტიტულოვანი კლუბი 25 ქულით მეექვსე ადგილზეა.