ანჩელოტი: „ტრანსფერები ჩვენთვის დაიხურა“
ზაფხულის სატრანსფერო ფანჯრის დახურვამდე თითქმის სამი კვირა კიდევ არის დარჩენილი, მაგრამ უკვე გაირკვა, რომ მადრიდის „რეალი“ არც ერთ ფეხბურთელს აღარ დაიმატებს. ამის შესახებ სამეფო კლუბის იტალიელმა დამრიგებელმა კარლო ანჩელოტიმ „მალიორკასთან“ წინასამატჩო პრეს-კონფერენციაზე განაცხადა. მისი თქმით, ცენტრალური მცველის დამატებას აპირებდნენ, მაგრამ იქიდან გამომდინარე, რომ მის განკარგულებაში კვლავ რჩება დავიდ ალაბა და საჭიროების შემთხვევაში „კასტილიიდანაც“ შეუძლიათ რამდენიმე ნიჭიერი ახალგაზრდა უკანა ხაზელის დამატება, ტრანსფერის განხორციელების აუცილებლობა აღარ არსებობს.
ყველაზე ხშირად ბოლო პერიოდში „ბლანკოსში“ გადასვლას ესპანეთის ნაკრებისა და „ალ ნასრის“ ცენტრალურ მცველს აიმერიკ ლაპორტს უკავშირებდნენ, მაგრამ მხარეებმა შეთანხმებას ვერ მიაღწიეს და ეს უკანასკნელი საუდის არაბეთის ჩემპიონატში დარჩა, სადაც ყოველწლიურად ხელფასის სახით 22 მილიონ ევროს იღებს.
შეგახსენებთ, რომ მადრიდის „რეალმა“ „პარი სენ-ჟერმენიდან“ თავისუფალი აგენტის სტატუსით კილიან მბაპე დაიმატა, ხოლო „პალმეირასს“ ენდრიკის სანაცვლოდ 35 მილიონი ევრო გადაუხადა.
