ახალ სქემაში კვარას მეტი თავისუფლება აქვს და ეს ძალიან საინტერესოა - ნაპოლის ექსმწვრთნელი
„ნაპოლის“ ყოფილმა მწვრთნელმა, ვალტერ ნოველინომ „პართენოპეის“ ახალ მწვრთნელზე, ანტონიო კონტეზე და კლუბის ქართველ გარემარბზე, ხვიჩა კვარაცხელიაზე ისაუბრა. ნოველინო ამბობს, რომ ახალ სათამაშო სქემაში, რომლითაც კონტე გუნდს ათამაშებს, კვარა თავის შესაძლებლობებს უფრო კარგად გამოავლენს.
რა თქვა ვალტერ ნოველინომ:
„კონტეს მოსვლის შემდეგ კვარაცხელია თამაშის სტილს შეიცვლის? მას მეტი თავისუფლება აქვს და ეს ძალიან საინტერესო იქნება. ახალ სქემაში მას თავისი კრეატიულობის გამოსავლენად უფრო მეტი შესაძლებლობა ექნება. დარწმუნებული ვარ, რომ ქართველს ექნება შესაძლებლობა, დაამტკიცოს, რომ მას უკეთესად თამაში შეუძლია“.
რაც შეეხება „ნაპოლის“ ახალ მწვრთნელს, ნოველინო აცხადებს, რომ კონტეს შეუძლია, ჩამოაყალიბოს ისეთი გუნდი, რომელიც კვლავ ჩემპიონობისთვის იბრძოლებს.
„კონტე სერია ა-ს ძალიან კარგად იცნობს, ისევე როგორც „ნაპოლის“ და აურელიო დე ლაურენტისს. ეს ძალიან მნიშვნელოვანია. ახლა კლუბმა ოსიმენთან დაკავშირებული პრობლემა უნდა მოაგვაროს. დარწმუნებული ვარ, რომ ხანგრძლივ პერსპექტივაში დე ლაურენტისი შექმნის გუნდს, რომლითაც კონტე ჩემპიონობისთვის იბრძოლებს“.
სერია ა-ს პირველ ტურში „ნაპოლი“ სტუმრად „ვერონას“ შეხვდება. მატჩი 18 აგვისტოს თბილისის დროით 20:30 საათზე დაიწყება.
