გოლი და საგოლე პასი - რონალდუმ სეზონი ბრწყინვალედ დაიწყო
საუდის არაბეთში საფეხბურთო სეზონი სუპერ თასით დაიწყო, სადაც ერთმანეთს ალ ნასრი და ალ ტაავონი დაუპირისპირდნენ.
როგორც ყოველთვის, ძირითად შემადგენლობაში მოგვევლინა კრიშტიანუ რონალდუ, რომელსაც დიდებული მატჩი ჰქონდა.
ანგარიში იაჰიამ მერვე წუთზე სწორედ პორტუგალიელის პასით გახსნა. პირველი ტაიმი 1:0 დასრულდა.
მეორე ნახევარში ალ ნასრი კიდევ უფრო მეტად გააქტიურდა და 57-ე წუთზე თავი ამჯერად თავად კრიშტიანუმ გამოიჩინა. ალ ტაავონი ბევრს ცდილობდა, მაგრამ მატჩში გარდატეხა ვერ შეიტანა.
მაშ ასე - პორტუგალიელი სუპერვარსკვლავი ახალ სეზონს გოლით და საგოლე პასით ხსნის. მისი გუნდი კი ფინალში საუდის არაბეთის მოქმედ ჩემპიონს ალ ჰილალს დაუპირისპირდება.
