ფენერბაჰჩეს გიუნდოგანის შეძენა სურს
თურქული მედიის ცნობით, „ფენერბაჰჩე“ ილქაი გიუნდოგანის შეძენითაა დაინტერესებული.
როგორც გამოცემა Spor Arena იტყობინება, ფრედის ტრავმისა და რადე კრუნიჩის არადამაჯერებელი თამაშის ფონზე, ჟოზე მოურინიოს ნახევარდაცვის გაძლიერება სურს. თურქული მედიის ინფორმაციით, მოურინიომ გიუნდოგანის ტრანსფერს მწვანე შუქი აუნთო, კლუბის ვიცე-პრეზიდენტმა, აჯუნ ილიჯალიმ გერმანელი ფეხბურთელის წარმომადგენლებთან მოლაპარაკებები დაიწყო.
ამჟამად 33 წლის გიუნდოგანი აშშ-ში იმყოფება, სადაც „ბარსელონა“ წინასასეზონო ტურნეს მართავს. გიუნდოგანი გუნდს ევროპის ჩემპიონატის შემდეგ შეუერთდა და მადრიდის „რეალის“ წინააღმდეგ 13 წუთი ითამაშა.
გიუნდოგანი „ბარსელონაში“ გასული წლის ზაფხულში გადავიდა და გუნდისთვის შეუცვლელ ფეხბურთელად იქცა.
