პარიზში ძალიან დიდი მისია გხვდათ წილად - პარასპორტსმენები პარალიმპიადაზე მიემგზავრებიან
„თქვენ უკვე გამარჯვებული მიდიხართ პარაოლიმპიურ თამაშებზე, თუმცა ცხადია, გვჭირდება ძალიან დიდი მიღწევები თქვენგან და დარწმუნებული ვარ, ეს პარაოლიმპიური თამაშები იქნება წარმატებული ჩვენი ნაკრებისთვის“, - ამის შესახებ საქართველოს პრემიერ-მინისტრმა ირაკლი კობახიძემ პარიზის 2024 წლის პარაოლიმპიურ თამაშებზე, პარასპორტსმენების გაცილების ცერემონიაზე სიტყვით გამოსვლისას განაცხადა.
მთავრობის მეთაურმა პარაოლიმპიურ ნაკრებს წარმატებული ასპარეზობა უსურვა.
„ჩემთვის ძალიან დიდი პატივია, რომ დღეს შემიძლია, წარმატებები გისურვოთ პარიზის პარაოლიმპიურ თამაშებზე. თქვენ ძალიან დიდი მისია გხვდათ წილად პარიზის პარაოლიმპიადაზე, თქვენ განასახიერებთ ჩვენი ხალხის საუკეთესო თვისებებს და წარმოადგენთ ჩვენი ხალხის, ქართველი ხალხის, გაუტეხელ და დაუმარცხებელ სულს. ეს არის ძალიან დიდი პატივი, რომელიც თქვენ თავდაუზოგავი შრომით მოიპოვეთ და შეძელით შეუძლებელი სპორტული მწვერვალებისაკენ მიმავალ გზაზე. თქვენ ისეთი გამოწვევები გადალახეთ, რომლებიც შეიძლება, ბევრისთვის იყო თავიდან წარმოუდგენელი, თუმცა თქვენი ნიჭიერებით, ნებისყოფით ყველას აჩვენეთ, რომ შეუძლებელი არაფერია და საბოლოო ჯამში ნებისმიერი შედეგის მიღწევა არის შესაძლებელი. შესაბამისად, თქვენ უკვე გამარჯვებული მიდიხართ ამ პარაოლიმპიურ თამაშებზე, თუმცა ცხადია, ჩვენ გვჭირდება ძალიან დიდი მიღწევები თქვენგან და დარწმუნებული ვარ, ეს პარაოლიმპიური თამაშები იქნება წარმატებული ჩვენი ნაკრებისთვის. მინდა, კიდევ ერთხელ წარმატებები გისურვოთ. რა თქმა უნდა, თითოეული ჩვენგანის მზერა იქნება მიმართული პარიზისა და თქვენი ასპარეზობისკენ“, - განაცხადა პრემიერმა.
მთავრობის მეთაურის თქმით, ხელისუფლება ბევრს აკეთებს ქართული სპორტის, მათ შორის პარაოლიმპიური სახეობების, მხარდასაჭერად.
„2012 წლამდე სპორტის ორ სახეობაში მხოლოდ 3 სპორტსმენი გვყავდა. თანდათანობით ვითარდება პარაოლიმპიური სახეობები და დღეისათვის პარაოლიმპიური კომიტეტი 15 სახეობაში მოასპარეზე 350 სპორტსმენს აერთიანებს. ამის შედეგია ის, რომ დღეს გვაქვს ასეთი მაჩვენებელი პარიზის თამაშებზე - 6 სახეობაში 14 პარასპორტსმენი იქნება წარმოდგენილი, რაც სარეკორდო მაჩვენებელია. სპორტის მხარდაჭერის ერთ-ერთი გამოხატულება იყო ის, რომ გავეცით დაპირება ჩვენს ოლიმპიელებზე პრემიებთან დაკავშირებით. როგორც მოგეხსენებათ, ოქროს მედალზე დაწესებულია მილიონიანი პრემია ჩვენი ოლიმპიელებისთვის, ნახევარი მილიონი - ვერცხლის მედლის და 250 000 ლარი - ბრინჯაოს მედლის შემთხვევაში. რა თქმა უნდა, ზუსტად იდენტური პრემიები იქნება დაწესებული პარაოლიმპიურ თამაშებზე თქვენი წარმატებისთვის. მინდა, კიდევ ერთხელ გისურვოთ ძალიან დიდი წარმატებები. ჩვენი მზერა თავიდან ბოლომდე თქვენკენ იქნება მოპყრობილი და დარწმუნებული ვარ, გამარჯვებულები დაგვიბრუნდებით თბილისში“, - აღნიშნა პრემიერ-მინისტრმა.
ცერემონია საქართველოს პარაოლიმპიური კომიტეტის პრეზიდენტმა რატი იონათამიშვილმა გახსნა. ქართველ პარასპორტსმენებს წარმატებული ასპარეზობა უსურვეს საქართველოს პარლამენტის თავმჯდომარე შალვა პაპუაშვილმა, თბილისის მერმა კახა კალაძემ და საქართველოში საფრანგეთის რესპუბლიკის ელჩმა შერაზ გასრიმ.
პარიზში, პარალიმპიური თამაშები 28 აგვისტოდან, 8 სექტემბრის ჩათვლით გაიმართება.
საქართველოს პარალიმპიური ნაკრები პარიზის ზაფხულის 17-ე პარალიმპიურ თამაშებზე სპორტის 6 სახეობაში 14 პარაათლეტით იასპარეზებს.
საქართველოს ნაკრების შემადგენლობა ასეთია:
ეტლით ფარიკაობა:
- ირმა ხეცურიანი;
- ნინა თიბილაშვილი.
პარა მძლეოსნობა:
- გიორგი ოჩხიკიძე (ბირთვის კვრა);
- დავით ქავთარაძე (სიგრძეზე ხტომა);
პარა ტაეკვონდო:
- ანა ჯაფარიძე (-54 კგ);
- ლია ჩაჩიბაია (-47 კგ);
- გიორგი ნიკოლაძე (-70 კგ).
პარა სროლა:
- ვლადიმერ ჭინჭარაული (შაშხანით სროლა R4 და R5 კატეგორიებში 10 მეტრზე და R9 კატეგორიაში 50 მეტრზე);
პარა ძიუდო:
- ზურაბ ზურაბიანი ( -60 კგ);
- გიორგი ქალდანი (-73 კგ);
- ინა ქალდანი (+70 კგ);
- ლაშა ყიზილაშვილი (-90 კგ);
- რევაზ ჩიკოიძე (+90 კგ).
პარა წოლჭიმი:
- კაკი ჯინჭარაძე (+107 კგ).
