პარიზის ოლიმპიადა | ქართველი ჯუდოკების პირველი მეტოქეები ცნობილია

27 ივლისიდან 3 აგვისტოს ჩათვლით, პარიზის ოლიმპიურ თამაშებზე, ძიუდოს დღეებია. რამდენიმე წუთის წინ, წილისყრის ცერემონია ჩატარდა და ქართველი ჯუდოკების პირველი მეტოქეების ვინაობები გაირკვა.

-60 კილოგრამი წონითი კატეგორია

გიორგი სარდალაშვილი პირველ რაუნდში დაისვენებს. მეორე რაუნდში, იგი იამ ვოლჩაკისა (22-ე ნომერი) და არნოლდ კისოკას (66-ე ნომერი) წყვილის გამარჯვებულს დაუპირისპირდება. სარდალაშვილი C ჯგუფში მოხვდა და ნახევარფინალში მისი მეტოქე სავარაუდოდ ლუკა მხეიძე იქნება.

-66 კილოგრამი წონითი კატეგორია

ვაჟა მარგველაშვილი პირველ რაუნდში დაისვენებს. მეორე რაუნდში მისი ოპონენტი მოჰამად რაშნონეჟადი (164-ე ნმერი) ან ვალიდე ხიარი (მე-16 ნომერი) იქნება.

-73 კილოგრამი წონითი კატეგორია

ლაშა შავდათუაშვილი პირველ რაუნდში მსოფლიო რეიტინგის 35-ე ნომერს, ჟოან-ბენიამინ გაბას დაუპირისპირდება. შავდათუაშვილს ნახევარფინალში გასასვლელად, დიდი ალბათობით, იაპონელი ჯუდოკას, სოიჩი ჰაშიმოტოს ბარიერის დაძლევა მოუწევს, რომელიც ლაშას მსგავსად, C ჯგუფში მოხვდა.

-81 კილოგრამი წონითი კატეგორია

ტატო გრიგალაშვილი მეორე რაუნდში მიჰაილ ლატისევს შეხვდება, რომელიც IJF-ის რეიტინგში 28-ე პოზიციას იკავებს. გრიგალაშვილი C ჯგუფშია და მატიას კასესა და ფინალამდე არ ხვდება.

-90 კილოგრამი წონითი კატეგორია

ლაშა ბექაური პირველ რაუნდში დაისვენებს. მეორე რაუნდში იგი ივაილო ივანოვს (მე-13 ნომერი) ან კარამნობ საგაიპოვს შეხვდება. ბექაური A ჯგუფშია და ნახევარფინალამდე, მისი ყველაზე რთული მეტოქე კრისტიან პარლატი გახლავთ.

-100 კილოგრამი წონითი კატეგორია

ილია სულამანიძე პირველ რაუნდში დაისვენებს. მეორე რაუნდში იგი 24-ე ნომერ ზლატკო კუმრიჩს ან მე-17 ნომერ ჯენარო პირელის დაუპირისპირდება. სულამანიძე და ჟორჟე ფონსეკა ერთ ჯგუფში არიან, რაც ნიშნავს, რომ ილიას ძალიან ძნელი ბადე ელის.

+100 კილოგრამი წონითი კატეგორია

გურამ თუშიშვილი პირველ რაუნდში დაისვენებს. მეორე რაუნდში მისი მეტოქე მბაგნიკ ნდიაე (30-ე ნომერი) ან ბუბაქარ მანე (51-ე ნომერი) იქნება. თუშიშვილი და ტედი რინერი ერთ ბადეში არიან და სავარაუდოდ, მას მათი დაპირისპირება მეოთხედფინალში გაიმართება.

ქალთა -57 კილოგრამი წონითი კატეგორია

ეთერ ლიპარტელიანი პირველ შეხვედრას 28-ე პოზიციას მყოფ ლელე ნაირნესთან გამართავს.

-63 კილოგრამი წონითი კატეგორია

ეთერ ასკილაშვილის პირველი მეტოქე ანდრეია ლესკი გახლავთ - მეშვიდე ნომერი.

+78 კილოგრამი წონითი კატეგორია

სოფიო სომხიშვილი მედლისთვის ბრძოლას რენე ლუხტთან დაიწყებს.