ჩემპიონთა ლიგა: კაშიას სლოვანის ფრე სტუმრად - ვაისის გუნდის კარგი შანსი

ჩემპიონთა ლიგის მეორე საკვალიფიკაციო ეტაპის პირველ შეხვედრაში გურამ კაშიას ბრატისლავის „სლოვანი“ სტუმრად სლოვენიურ „ცელიეს“ დაუპირისპირდა და ფრედ 1:1 ითამაშა.

მატჩი ორივე გუნდმა აქტიურად დაიწყო და მე-11 წუთისთვის ანგარიში 1:1 იყო, თუმცა 30-ე წუთზე „სლოვანის“ ბერძენმა საყრდენმა, რომელიც ჯაბა კანკავას შემცვლელია, წითელი ბარათი მიიღო და თავისი გუნდი უმცირესობაში დატოვა.

მეორე ტაიმში „ცელიე“ უპირატესობას დაეუფლა, თუმცა 13 მცდელობიდან გოლის გატანა ვერ შეძლო.

რაც შეეხება კაშიას, ის სასტარტოში იმყოფებოდა და შეუცვლელად ითამაშა. გურამმა საკმაოდ დამაჯერებელი მატჩი ჩაატარა.

სლოვანი წყვილში უკვე ფავორიტის სტატუსით სარგებლობს. ერთ კვირაში ვლადიმირ ვაისის გუნდი „ცელიეს“ საკუთარ კედლებში დაუპირისპირდება.