კონფერენს ლიგა: ბათუმის დინამო შინ დეჩიჩთან დამარცხდა

კონფერენს ლიგის მეორე საკვალიფიკაციო ეტაპის პირველ შეხვედრაში ბათუმის „დინამომ“ მონტენეგროს ჩემპიონს „დეჩიჩს“ უმასპინძლა და რადიკალურად განსხვავებული ნათამაშები ტაიმების შედეგად 0:2 დამარცხდა.

დემჩენკოს გუნდმა პირველი ნახევარი დამაჯერებლად ჩაატარა, სოლიდური უპირატესობაც ჰქონდა და საგოლე მომენტებიც საკმაო რაოდენობით შექმნა, თუმცა გოლის გატანა ვერ შეძლეს.

მეორე ტაიმიც მსგავსი სცენარით დაიწყო - ბურთი „დინამოს“ ჰქონდა, უტევდა, თუმცა კამაიმ 62-ე წუთზე თავისი გუნდის პირველივე შეტევა გოლად აქცია.

66-ე წუთზე მან დუბლი გაიფორმა და ბათუმელებისთვის ყველაფერი თავდაყირა დააყენა. ეს იყო დემონსტრირება იმისა, თუ როგორ უნდა გამოიყენო შენი შექმნილი შანსები. მეტოქემ ეს 100%-ით ზუსტად გააკეთა, „დინამომ“ ვერა.

მსაჯის მიერ დამატებულ 8 წუთშიც არაფერი მოხდა. ბათუმელები 4 წუთში გაშვებულმა ორმა გოლმა საბოლოოდ გატეხა.

აღსანიშნავია, რომ ეს „დეჩიჩისთვის" ევროსარბიელზე ისტორიაში პირველი გამარჯვება იყო...

შეგახსენებთ, რომ განმეორებითი შეხვედრა მონტენეგროში ზუსტად ერთ კვირაში 30 ივლისს (23:00) გაიმართება.