ესპანურ პრესაშიც დაადასტურეს | წიტაიშვილი გრანადას უახლოვდება
საქართველოს ნაკრების ფეხბურთელი, გიორგი წიტაიშვილი შესაძლოა, „გრანადაში“ გადავიდეს. ეს ინფორმაცია თავდაპირველად Geo Team-მა გაავრცელა, მოგვიანებით კი ესპანურ კლუბთან დაახლოებულმა გამოცემებმა დაადასტურეს.
Granadadigital-ის ცნობით, „თეთრ-წითლები“ წიტაიშვილის ვარიანტზე სერიოზულად ფიქრობენ. გარიგება დასკვნით ეტაპზეა, მაგრამ დახურული ჯერ არაა. მხარეებს რამდენიმე საკითხი აქვთ მოსაგვარებელი და სწორედ ამაზე მიდის მუშაობა.
Hemos verificado el interés rojiblanco en Tsitaishvili. La operación estaría avanzada, pero no cerrada. Si todo marcha como hasta ahora, llegaría cedido. El cuarto estaba al caer y el club quiere que vaya a Montecastillo. Puede ser el georgiano.https://t.co/FaOmzBmhy8
— Chema Ruiz España (@Chema_Ruiz22) July 23, 2024
„გრანადა“ წიტაიშვილს იჯარის წესით გადაიყვანს, რომლის ხანგრძლივობაც 1 წელი იქნება. ესპანურ კლუბს გიორგის ხელშეკრულების გამოსყიდვის უფლება არ ექნება, მაგრამ IDEAL-ი წერს, რომ ქართველი ფეხბურთელის წარმომადგენლებმა „გრანადასგან“ იმედისმომცემი განცხადებები მოისმინეს.
შეგახსენებთ, რომ წიტაიშვილი კიევის „დინამოს“ ფეხბურთელია და უკრაინულ კლუბთან კონტრაქტი 2025 წლის 30 ივნისამდე აკავშირებს. Transfermarkt-ზე მისი საბაზრო ღირებულება 800 000 ევრო გახლავთ. „გრანადას“ რაც შეეხება, „თეთრ-წითლები“ გასულ სეზონში ლა ლიგაში ასპარეზობდნენ, მაგრამ უმაღლეს დივიზიონში ადგილი ვერ შეინარჩუნეს.
