„შეტევაში შეუძლია X ფაქტორი იყოს, მაგრამ...“ - ფრანგი ჟურნალისტი ზურიკოს სენტ-ეტიენში ტრანსფერზე

ცნობილი ფრანგული გამოცემა Talk-ის ჟურნალისტი და „ბორდოს“ გულშემატკივარი, ჯონათან დ’აგოსტინო „სენტ-ეტიენში“ ზურიკო დავითაშვილის ტრანსფერს ეხმაურება და აღნიშნავს, რომ ჟირონდელებმა ქართველი ფეხბურთელი მოსალოდნელზე დიდ თანხად გაყიდა.

რას ამბობს დ’აგოსტინო:

„ვფიქრობდი, რომ მას 3-4 მილიონად გავყიდდით და კარგია, თუ ამ ტრანსფერში უფრო მეტი თანხის აღებას შევძლებთ. საკმაოდ კარგ ფასად გაიყიდა. სიმართლე გითხრათ, სკეპტიკურად ვუყურებ ამ ფეხბურთელის შანსებს ლიგა 1-ში, მაგრამ იმედი მაქვს, ვცდები. „ბორდოში“ ყოფნის პერიოდში, დაცვით ფაზაში და ასევე, ტაქტიკური თვალსაზრისით მისი თამაშით კმაყოფილი არ ვიყავი, მაგრამ თუ მოინდომებს და თამაშში ყველაფერს ჩადებს, შეუძლია შეტევაში X ფაქტორი იყოს. ამ მოთამაშის იმედი ყველას შეუძლია ჰქონდეს, მაგრამ მან ყველაფერი არა მხოლოდ 2-3 თვის განმავლობაში, არამედ მთელი სეზონის მანძილზე უნდა გააკეთოს“.

ფრანგულ მედიაში აქტიურად იწერება, რომ ზურიკო დავითაშვილი უახლოეს საათებში „სენტ-ეტიენის“ ფეხბურთელი გახდება. გავრცელებული ინფორმაციით, ქართველმა შემტევმა სამედიცინო შემოწმება უკვე გაიარა და ახლა მხოლოდ ტრანსფერის გაოფიციალურება დარჩა საჭირო.