ტრანსფერზე აქტიურად მუშაობენ | სენტ-ეტიენი დავითაშვილის გაფორმებას ცდილობს
„სენტ-ეტიენი“ ზურიკო დავითაშვილისთვის ბრძოლას განაგრძობს. ავტორიტეტული ფრანგული გამოცემის, Sport-ის ინფორმაციით, „მწვანეებმა“ „ბორდოს“ განახლებული წინადადებით მიმართეს და ჟირონდელთა პასუხს ელოდებიან.
„სენტ-ეტიენი“ ბოლო დღეებში გააქტიურდა და სურს, ტრანსფერი უახლოეს პერიოდში დახუროს. „მწვანეებს“ ქართველ გარემარბთან შეთანხმებისთვის ჯერ არ მიუღწევიათ, მაგრამ დავითაშვილი საფრანგეთის ლიგა 1-ში გადასვლის პერსპექტივით მოხიბლულია.
„ბორდოს“ იმედი აქვს, რომ ზურიკოს სანაცვლოდ 10 მილიონ ევროს მიიღებს. Sport-ის ცნობით, „სენტ-ეტიენის“ წინადადება 6 მილიონის ფარგლებშია და კლუბებს შორის, სატრანსფერო თანხაზე მოლაპარაკებები მიმდინარეობს. როგორც მოგეხსენებათ, „მწვანეებს“ იტალიიდან კონკურენტები გამოუჩნდნენ და ფრანგების გააქტიურება სწორედ ამით გახლდათ განპირობებული.
Tuttomercatoweb-ის ინფორმაციით, ქართველი გარემარბით „კომო“, „ვენეცია“ და „ჯენოა“ ინტერესდებიან. იტალიური გამოცემის ცნობით, დავითაშვილის წარმომადგენელი მალე იტალიას ეწვევა და დაინტერესებულ კლუბებთან მოლაპარაკებებს გამართავს. აღნიშნული გამოცემა ზურიკოს „ახალ კვარად'' მოიხსენიებს.
