ფელიქსის გაფუჭებული პენალტი | საფრანგეთმა პორტუგალია დაამარცხა და ნახევარფინალშია

ევროპის 2024 წლის ჩემპიონატის მეორე მეოთხედფინალში, ერთმანეთს პორტუგალიისა და საფრანგეთის ნაკრებები დაუპირისპირდნენ. შეხვედრის ძირითადი და დამატებითი დრო გამარჯვებულის გამოსავლენად საკმარისი არ აღმოჩნდა, პენალტების სერიაში კი „მამლებმა“ 5:3 მოიგეს.

მატჩის პირველი ტაიმი უაღრესად დაძაბული გამოდგა და სახიფათო მომენტი არც ერთ კართან შექმნილა. მე-20 წუთზე, ტეო ერნანდესმა შორიდან გაისროლა, მაგრამ დიოგუ კოშტა ადგილზე იყო და ბურთი მოიგერია. დარჩენილ დროში მნიშვნელოვანი არაფერი მომხდარა და გუნდები შესვენებაზე გატანილი გოლის გარეშე გავიდნენ - 0:0.

მეორე ნახევარში, განსხვავებული სცენარი ვიხილეთ. 61-ე წუთზე, ბრუნო ფერნანდეშს შესანიშნავი შანსი მიეცა, მაგრამ მისი დარტყმა მაიკ მენიომ მოიგერია. რამდენიმე წამის შემდეგ, გოლის გატანა ვიტინიას შეეძლო. მისი დარტყმის შემდეგ, მენიო მოწოდების სიმაღლეზე იყო და „მამლები“ კიდევ ერთხელ იხსნა.

66-ე წუთზე, რანდალ კოლო მუანიმ კარგი შანსი გაანიავა და „სელესაო“ რუბენ დიაშმა გადაარჩინა. 70-ე წუთზე, საფრანგეთს დაწინაურება კიდევ ერთხელ შეეძლო. ედუარდო კამავინგა ხელსაყრელ მდგომარეობაში აღმოჩნდა და მისი დარტყმა კარს სანტიმეტრებით ასცდა. 74-ე წუთზე უსმან დემბელემ გაისროლა, მაგრამ მიზანს მანაც ვერ მიაღწია, დარჩენილ დროში კი არაფერი შეცვლილა და ძირითადი დრო ფრედ, 0:0 დასრულდა.

პირველმა დამატებითმა ტაიმმა პორტუგალიის ნაკრების უპირატესობით ჩაიარა. 93-ე წუთზე, რონალდუს „სელესაოს“ წინ გაყვანა შეეძლო, მაგრამ მენიოს კარს ბურთი დიდი მანძილით ააცილა. შანსი ჰქონდა რაფა ლეაუსაც, მაგრამ მის დარტყმას დაიო უპამეკანო გადაეღობა. მეორე დამატებით ტაიმში, განსაკუთრებული არაფერი მომხდარა და გამარჯვებულის გამოსავლენად თერთმეტმეტრიანების სერია დაინიშნა - 0:0.

პენალტების სერიაში მეკარეებმა ვერც ერთი დარტყმა მოიგერიეს. გადამწყვეტი ჟოაუ ფელიქსის თერთმეტმეტრიანი აღმოჩნდა, რომელიც ძელს მოხვდა და საფრანგეთმა 5:3 იმარჯვა, რის წყალობითაც, ნახევარფინალში ესპანეთს დაუპირისპირდება.