„აი, ამიტომ ხარ ჩემზე დაბლა“ | ილიას პასუხი შონ ომალის
UFC-ის ქვემსუბუქი წონითი დივიზიონის ჩემპიონმა, ილია თოფურიამ შონ ომალის განცხადებას უპასუხა. „შუგამ“ X-ის საკუთარ გვერდზე პოსტი გამოაქვეყნა და უკმაყოფილება გამოხატა იმის გამო, რომ UFC-ის Pound-for-Pound (რეიტინგი წონის გაუთვალისწინებლად) რეიტინგში „ელ მატადორი“ მასზე მაღალ პოზიციას იკავებს.
ქართველი ჩემპიონი ომალის სიტყვებს X-ზე გამოეხმაურა. „კიდევ ერთი მოძულე, მაგრამ განსხვავება ისაა, რომ ეს ძალიან მახინჯია. აი, ახსნა-განმარტება რატომ ვარ უფრო მაღლა“, - დაწერა ილიამ და მარლონ ვერასთან გამართული პირველი ჩხუბისას დანოკაუტებული ომალის ფოტო დაურთო.
Another hater, but this one is ugly as fuck . https://t.co/JFRlSKNIlw
— Ilia Topuria (@Topuriailia) July 5, 2024
შეგახსენებთ, რომ UFC-ის Pound-for-Pound რეიტინგში „ელ მატადორი“ მე-5 გახლავთ, ომალი კი მასზე ერთით დაბალ, მე-6 პოზიციას იკავებს. რეიტინგის ლიდერი ისლამ მახაჩევია. მეორე ალექს პერეირა გახლავთ, მესამე - ჯონ ჯონსი, მეოთხე - ლეონ ედვარდსი.
ცნობისთვის, ომალიმ ბოლო ბრძოლა მარლონ „ჩიტო“ ვერას წინააღმდეგ გამართა და რევანში აიღო. დიდი ალბათობით, მისი მომდევნო მეტოქე მერაბ დვალიშვილი იქნება და მათი ბრძოლა სექტემბერში გაიმართება.
