მესის რეკორდი, არგენტინის დამაჯერებელი გამარჯვება | კოპა ამერიკა დაიწყო

კოპა ამერიკის გახსნით შეხვედრაში, მოქმედი ჩემპიონი, არგენტინის ეროვნული ნაკრები კანადას დაუპირისპირდა. „ალბისელესტე“ მოწოდების სიმაღლეზე იყო, ბევრი მომენტი შექმნა და დამაჯერებელი გამარჯვება იზეიმა - 2:0.

მატჩის პირველი ტაიმი გატანილი გოლის გარეშე დასრულდა, მეორე ნახევარში კი არგენტინას რამდენიმე რეალური მომენტი ჰქონდა. 49-ე წუთზე, „ალბისელესტე“ წინ გავიდა და გუნდი ხულიან ალვარესმა დააწინაურა. 88-ე წუთზე, თავი ლაუტარო მარტინესმა გამოიჩინა და ლიონელ მესის გადაცემით საბოლოო ანგარიში დააფიქსირა.

კანადასთან შეხვედრაში, „ლა პულგამ“ ისტორიული შედეგი გაიფორმა და კოპა ამერიკაზე ჩატარებული მატჩების რაოდენობით, რეკორდსმენი გახდა. მესიმ კოპა ამერიკაზე 35-ე შეხვედრა ჩაატარა და ჩილელი მეკარის, სერხიო ლივინგსტონის მიღწევა გააუმჯობესა. ამასთან, მესიმ კოპა ამერიკაზე მე-17 საგოლე გადაცემა შეასრულა და 2011 წლიდან მოყოლებული, ამაზე უკეთესი შედეგი არავის აქვს.

ცნობისთვის, არგენტინა A ჯგუფშია და კანადის გარდა, მისი მეტოქეები პერუსა და ჩილეს ნაკრებები არიან. „ალბისელესტე“ მეორე შეხვედრას 26 ივნისს გამართავს და ჩილეს დაუპირისპირდება.