„დანაკლისი გვაქვს, მაგრამ გეგმა უცვლელია“ - სანიოლი თურქეთთან მატჩზე

ხვალ, საქართველოს ფეხბურთელთა ნაკრები ევროპის ჩემპიონატზე სადებიუტო შეხვედრას გამართავს. ვილი სანიოლის გუნდი დორტმუნდში „ზიგნალ იდუნა პარკზე“ თურქეთის ეროვნულ გუნდს დაუპირისპირდება.

შეხვედრამდე 1 დღით ადრე საქართველოს ნაკრების მთავარმა მწვრთნელმა, ვილი სანიოლმა პრესკონფერენცია გამართა და ჟურნალისტების კითხვებს უპასუხა.

ვილი სანიოლი:

კიტეიშვილისა და კვეკველიას მდგომარეობაზე:

საბა კვირკველია მზად არის ხვალინდელი მატჩისთვის, მაგრამ ოთარ კიტეიშვილი ჯერ კიდევ არ არის მზად.

გუნდის მგომარეობა თურქეთთან მატჩის წინ:

საბერძნეთთან მოგების შემდეგ, ზოგ ფეხბურთელს ემოციურად ცოტა გაუჭირდა, რათა ყოველდღიურ რუტინას დაბრუნებულიყვნენ. შეკრების დაწყების წინ ვთქვი, რომ ეს მათთვის ემოციურად რთული იქნებოდა, მაგრამ მოსამზადებელმა ეტაპმა კარგად დამანახა, რომ ასე არ არის. ნაკრები სრულად მზადაა ხვალინდელი მატჩისთვის.

თურქეთის ნაკრებზე:

ჩვენთვის, ხვალინდელი მატჩი ევროპის ჩემპიონატზე სადებიუტოა, თუმცა, ბევრი თურქი ფეხბურთელი ევროპის ჩემპიონატზე პირველად ითამაშებს. ამის მიუხედავად, მათ მაღალი დონის, ტექნიკური ფეხბურთელები ჰყავთ, რომლებიც შეტევაში ძლიერები არიან. ჩვენთვის ის დიდი გამოწვევა იქნება, მაგრამ ჩემი ფეხბურთელების მჯერა.

ქართველ გულშემატკივრებზე:

ყველა ქართველი გულშემატკივარი, ვინც არის აქ, ვინც თვალს გვადევნებს საქართველოდან და არის ნაკრების ირგვლივ, საოცარი ხალხია და ბრწყინვალე გულშემატკივრობა იციან.

ხვიჩა კვარაცხელიას პოზიციაზე:

ნაპოლის სხვანაირი ტაქტიკური მონახაზები აქვს, ჩვენ სხვანაირი, ამიტომ მის პოზიციაზე ბევრს ვერ ვისაუბრებ. არ აქვს მნიშვნელობა, მარცხნივ ითამაშებს, თუ მეორე ფორვარდად. ჩემთვის მთავარია, მან მოედანზე მაქსიმუმი გააკეთოს და დავალება შეასრულოს.

კვარაცხელიას მომავალზე:

როცა კარგი ფეხბურთელი ხარ, ლოგიკურია, რომ შენს მომავალზე ბევრი იწერება. თუ ის ევროპის ჩემპიონატზე მაღალ დონეზე ითამაშებს, მისი კარიერა ბევრად უკეთესობისკენ წავა. ხვიჩას მომავალზე ბევრს ვერაფერს ვიტყვი, რადგან მე მხოლოდ იმას ვუყურებ, რას გააკეთებს ის მოედანზე.

კიტეიშვილის არყოფნა ნაკრებისთვის:

კიტეიშვილის დანაკლისი ჩვენთვის ძალიან მძიმეა, თუმცა გვყავს ფეხბურთელები, ვისიც მჯერა და შეუძლიათ კიტეს ჩანაცვლება. დიდი იმედი მაქვს, კიტეიშვილი შემდეგი მატჩისთვის მზად იქნება.

საქართველოსა და თურქეთის ნაკრებების დაპირისპირება ხვალ, საქართველოს დროით 20:00 საათზე დაიწყება.