ბრწყინვალე ჯუდ ბელინგემი - ინგლისმა ევრო 2024 გამარჯვებით დაიწყო
ევროპის ჩემპიონატის ერთ-ერთმა ფავორიტმა ინგლისის ნაკრებმა ევრო 2024 გამარჯვებით დაიწყო, ჯუდ ბელინგემის ერთადერთი გოლით სერბეთი დაამარცხა.
მე-13 წუთზე უოკერის შესანიშნავი პასით საკამ შეტევა გაამწვავა, ბუკაიოს ჩაწოდებისას ბურთი სერბთა მცველს მოხვდა და რიკოშეტის შემდეგ ბელინგემმა თავური დარტყმით ანგარიში გახსნა. როგორც შემდგომ აღმოჩნდა, ამ მატჩში ეს გოლი ერთადერთი იყო.
გოლის გატანის გარდა ზოგადად ჯუდმა ბრწყინვალე მატჩი ჩაატარა, შეტევასა თუ დაცვაში უშეცდომო იყო, ამასთან ერთად ტრადიციულად სანახაობრივი თამაში შესთავაზა პუბლიკას. მატჩის საუკეთესო ფეხბურთელად ჯუდი დასახელდა.
ამავე ჯგუფის პირველ შეხვედრაში დანია ერიქსენის გოლით სლოვენიას ამარცხებდა, თუმცა ერიკ იანჟამ ანგარიში გაათანაბრა და სკანდინავიელებმა 2 ქულა დაკარგეს.
მეორე ტურში სლოვენია-სერბეთს დაუპირისპირდება (20 ივნისი, 17:00), დანიის მეტოქე ინგლისი იქნება (20 ივნისი, 20:00).
