პორტუგალიამ ისევ 2 გოლი გაუშვა - ხორვატიამ ისტორიაში პირველად მოუგო
ევრო 2024-ის დაწყებამდე მიმდინარე თვეში პორტუგალიის ნაკრებმა მეორე ამხანაგური მატჩი გამართა. ლისაბონში ფინეთთან გამარჯვების (4:2) შემდეგ რობერტო მარტინესის გუნდი ხორვატიასთან დამარცხდა (1:2). კრიშტიანუ რონალდუმ ორივე ამხანაგური შეხვედრა გამოტოვა.
ხორვატიამ პორტუგალიას ისტორიაში პირველად მოუგო.
ანგარიში მე-8 წუთზე ლუკა მოდრიჩმა პენალტით გახსნა, 48-ე წუთზე დიოგუ ჟოტამ ანგარიში გაათანაბრა, თუმცა მალევე, 56-ე წუთზე ანტე ბუდიმირმა გამარჯვების მომტანი გოლი შეაგდო.
2018 წელს პორტუგალიამ ამხანაგური შეხვედრა შინ ნიდერლანდებთან 0:3 დათმო. 2018 წლის შემდეგ პორტუგალია ამხანაგურ შეხვედრაში შინ პირველად ხორვატიასთან დამარცხდა.
ევრო 2024-ის დაწყებამდე რობერტო მარტინესის გუნდი ბოლო ამხანაგურ მატჩს 11 ივნისს ირლანდიასთან გამართავს.
ევრო 2024-ზე F ჯგუფში პორტუგალია, ჩეხეთი, თურქეთი და საქართველო ითამაშებენ. პორტუგალია ჯერ ჩეხეთს (18 ივნისი), შემდეგ თურქეთს (22 ივნისი), ბოლოს კი საქართველოს (26 ივნისი) დაუპირისპირდება.
საქართველოს ნაკრების მატჩების განრიგი
ამხანაგური მატჩი
9 ივნისი | მონტენეგრო - საქართველო | 22:45
ევრო 2024
18 ივნისი | თურქეთი - საქართველო | 20:00
22 ივნისი | საქართველო - ჩეხეთი | 17:00
26 ივნისი | საქართველო - პორტუგალია | 23:00
