ფოტო არქივიდან - ვირცის ტრანსფერი რეალური ხდება

ახალი მთავარი მწვრთნელის, ჰანს-დიტერ ფლიკის მისვლის შემდეგ ყველას აქვს მოლოდინი, რომ ზაფხულის სატრანსფერო ფანჯრის დროს „ბარსელონა“ საკმაოდ აქტიური იქნება და გერმანელი სპეციალისტი გუნდს იმ ფეხბურთელებით დააკომპლექტებს, რომლებიც მის ტაქტიკურ სქემაში კარგად ჩაჯდებიან. ასეთებს შორისაა გასული სეზონის ერთ-ერთი აღმოჩენა ფლორიან ვირცი, რომელიც როგორც კატალონიური კლუბის პორტუგალიელი სპორტული დირექტორი დეკუ სოუზა იუწყება, მათი მთავარი სატრანსფერო სამიზნე იქნება.

ვირცის „ბარსელონაში“ გადასვლა კიდევ უფრო რეალური გახდა Mundo Deportivo-ში გამოქვეყნებული სტატიის შემდეგ, რომელსაც დართული ჰქონდა ფეხბურთელის ბავშვობის ფოტო, სადაც მას „ბლაუგრანას“ მაისური აცვია. როგორც აღმოჩნდა, „ლევერკუზენის“ ლიდერი ბავშვობიდან „ბარსას“ გულშემატკივარი იყო და საძინებელი ოთახი ლიონელ მესის, უსმან დემბელესა და პიერ-ემერიკ ობამეიანგის სურათები ჰქონდა აჭრელებული.

საქმეს აიოლებს ფლიკის ფაქტორიც, რომელთანაც ფეხბურთელს განსაკუთრებული დამოკიდებულება აქვს, რადგან გერმანიის ნაკრებში მისი დებიუტი 2021 წლის 2 სექტემბერს ლიხტეინშტეინთან შეხვედრაში სწორედ მაშინ შედგა, როდესაც ბუნდესნაკრებს „ბარსელონას“ ახლანდელი დამრიგებელი ხელმძღვანელობდა. გერმანიის ჩემპიონატში გასულ სეზონში ფლორიან ვირცმა 32 შეხვედრაში თავი 11 გოლითა და 11 საგოლე გადაცემით გამოიჩინა.