იბერიას ზედიზედ მესამე მარცხი

სეზონის შთამბეჭდავად დაწყების შემდეგ, „იბერიას“ ბოლო პერიოდში ჩავარდნა დაეწყო და Crystalbet ეროვნული საფეხბურთო ლიგის პირველი წრე ზედიზედ სამი მარცხით დაასრულა. „კოლხეთთან“ (0:2) და “გაგრასთან“ (0:4) წაგებებს, დღეს, მე-18 ტურში „სამგურალთან“ (1:2) წარუმატებლობა მოჰყვა.

წყალტუბოს კლუბის შემადგენლობაში საუკეთესო დემურ ჩიხლაძე გახლდათ, რომლის ანგარიშზეც საგოლე პასი და გამარჯვების გოლია. 27 წლის ნახევარმცველმა 26-ე წუთზე დასარტყმელ პოზიციაზე გიორგი ფანცულაია გაიყვანა, ამ უკანასკნელმა კი მასპინძელთა მეკარე ლაზარე კუპატაძეს ბურთი თავზე გადაუგდო და ანგარიში ეფექტური დარტყმით გახსნა.

მასპინძლებმა წონასწორობა მეორე ტაიმის დებიუტშივე აღადგინეს - გიორგი კოხრეიძისა და შეიკნე სილას მიერ გათამაშებული კომბინაცია ულამაზესი და უზუსტესი დარტყმით შოთა ნონიკაშვილმა დაასრულა. 65-ე წუთზე დემურ ჩიხლაძემ ძალიან შორი მანძილიდან ჩააწოდა და ბურთი კარში ისე გავიდა, რომ არც ერთი ფეხბურთელი არ შეჰხებია - ამ მომენტში კუპატაძის აშკარა შეცდომაზე შეიძლება საუბარი.

ამ ტურის შემდეგ ჩემპიონატში დაახლოებით ორთვიანი შესვენება გამოცხადდება. მომდევნო, მე-19 ტურში კი „იბერია“ „თელავს“ უმასპინძლებს, „სამგურალი“ კი სტუმრად თბილისის „დინამოსთან“ ითამაშებს.