კალათბურთელთა ნაკრები ოლიმპიადის საგზურისთვის - ჯიკიჩმა შემადგენლობა დაასახელა

საქართველოს კალათბურთელთა ეროვნული გუნდი პარიზის 2024 წლის ზაფხულის ოლიმპიური თამაშების შესარჩევი ეტაპისთის მზადებას შეუდგა. წინასაშეკრებო ვარჯიშები თბილისში 9 ივნისამდე გაგრძელდება, რის შემდეგაც გუნდი ქალაქ ტრევიზოში გაემგზავრება და 10-დღიან საწვრთნელ პროცესს გაივლის. უკვე ცნობილია 23-კაციანი გაფართოებული შემადგენლობა, რომელიც სერბი მთავარი მწვრთნელის, ალექსანდარ ჯიკიჩის განკარგულებაში იქნება.

საქართველოს ნაკრების შემადგენლობა

 

რატი ანდრონიკაშვილი (სარაგოსა), ოთარ ფხაკაძე (დელტა), გიორგი ოჩხიკიძე (ქუთაისი), ლუკა მაზიაშვილი (კავკასია), დუდა სანაძე (ატომერომუ), ჯო ტომასონი (მაკაბი), დავით კაკუშაძე (ვსა), ნიკოლოზ გაფრინდაშვილი (კავკასია), კახაბერ ჯინჭარაძე (თსუ), ცოტნე ცარციძე (ჩრდ.დაკოტა), ალექსანდრე მერკვილაძე (ლოიოლა მერიმაუნტი), ოთარ ბულიავა (ბათუმი), ნიკოლოზ მეცხვარიშვილი (ლუიზიანა, აშშ), ალექსანდრე ფევაძე (თსუ), თორნიკე შენგელია (ვირტუსი), სანდრო მამუკელაშვილი (სან ანტონიო), ბექა ბურჯანაძე (ლეიმა, ესპანეთი), გიორგი კორსანტია (ქუთაისი), ბექა ბექაური (თსუ), გოგა ბითაძე (ორლანდო), გიორგი ტურძილაძე (დელტა), გიორგი ბაქრაძე (ივერიონი), ილია ლონდარიძე (კავკასია)

23 ივნისს ჯიკიჩის მომზადებული გუნდი იტალიის ნაკრებთან საკონტროლო მატჩს ჩაატარებს. სპარინგები აპენინელებთან დაპირისპირებით არ ამოიწურება - იტალიიდან ქართველი კალათბურთელები იურმალაში გაემგზავრებიან, სადაც ამხანაგურ შეხვედრას 26 ივნისს კამერუნთან, 28 ივნისს კი ეგვიპტესთან ჩაატარებენ. 30 ივნისიდან საქართველოს ეროვნული ნაკრები უკვე რიგაში იქნება და ტურნირის დაწყების წინ ბოლო ვარჯიშებს ჩაატარებს.

ჯგუფური ეტაპზე ჩვენი ქვეყნის ეროვნული ნაკრები 2 ივლისს მასპინძელ ლატვიელებს, 4 ივლისს კი ფილიპინელებს შეხვდება. ჯგუფიდან ორი საუკეთესო ნახევარფინალში გავა და ჯვარედინად დაუწყვილდება B ჯგუფიდან გამოსულ ორ საუკეთესოს, სადაც ბრაზილია, მონტენეგრო და კამერუნი არიან. ნახევარფინალური მატჩები 6 ივლისს, ფინალი კი 7 ივლისს გაიმართება და ჩემპიონი „პარიზი 2024“-ის საგზურს მიიღებს.  ოლიმპიადის საკვალიფიკაციო ტურნირზე ასპარეზობა საქართველოს ნაკრებმა გასულ წელს იაპონიაში ჩატარებულ მუნდიალზე თექვსმეტ საუკეთესოთა შორის მოხვედრით გაინაღდა.