შენგელია ვერ გააჩერეს - ვირტუსი ფინალშია

იტალიის საკალათბურთო ჩემპიონატში ორივე ფინალისტის ვინაობა გაირკვა. „ვირტუსმა“ „ვენეცია“ ნახევარფინალის მეოთხე მატჩში სტუმრად 79:96 დაამარცხა, მოწინააღმდეგეს სერიაში 3:1 აჯობა და გადამწყვეტ შეხვედრაში თამაშის უფლება ზედიზედ მეოთხე მოიპოვა. არამხოლოდ ბოლონიელების, არამედ ორივე გუნდის შემადგენლობაში საუკეთესო თორნიკე შენგელია იყო, რომელმაც პარკეტზე გატარებულ 32 წუთში 29 ქულა, 3 მოხსნა და 2 შედეგიანი გადაცემა დააგროვა.

საქართველოს ნაკრების კაპიტანმა ლიდერობა საკუთარ თავზე სწორედ მაშინ აიღო, როდესაც სტუმრებს ყველაზე მეტად გაუჭირდათ და მოკლე მონაკვეთში 8 ქულა დააგროვა. ჯამში შენგელიამ თორმეტიდან რვა ორქულიანი, ხუთიდან ერთი სამიანი და თოთხმეტიდან ათი საჯარიმო ჩააგდო. სამივე შემთხვევაში ბურთი დაცვაში მოხსნა და მის ანგარიშზე ასევე ერთი დაკარგვა, ერთი ჩაჭრა, ორი ბლოკ-შოტი და ორი პერსონალური ჯარიმა იყო. გადამწყვეტ მატჩში „ვირტუსის“ მეტოქე „ოლიმპია მილანო“ იქნება, რომელმაც ნახევარფინალში „ბრეშია“ მარტივად, ყოველგვარი პრობლემების გარეშე, სერიაში 3:0 დაამარცხა. ჩემპიონობის მოგების შემთხვევაში, იტალიის სერია A-ს ოქროს მედლებს ბოლონიელები სამწლიანი პაუზის შემდეგ, მეჩვიდმეტედ მოიპოვებენ.

შიდა ჩემპიონატის მსგავსად, თოკოს წელს ევროლიგაშიც კარიერაში ერთ-ერთი საუკეთესო სეზონი ჰქონდა და 33 შეხვედრაში ჯამში 480 ქულა, 166 მოხსნა და 110 შედეგიანი გადაცემა დააგროვა, თუმცა მას თანაგუნდელებმა მხარი სათანადოდ ვერ აუბეს და „ვირტუსი“ პლეი ოფის მიღმა დარჩა.