ყველაზე ძვირადღირებული ფეხბურთელები | რომელ ადგილზეა კვარაცხელია

CIES საფეხბურთო ობსერვატორიამ მსოფლიოს ყველაზე ძვირადღირებული ფეხბურთელები დაასახელა, რომელთა სატრანსფერო ფასის დასადგენადაც, საკუთარი სტატისტიკური მოდელი გამოიყენა. CIES-მა ტოპ 100 შემოგვთავაზა და საუკეთესოთა შორის ხვიჩა კვარაცხელიაც მოხვდა.

„ნაპოლის“ ქართველი გარემარბი 37-ე პოზიციას იკავებს და მისი ღირებულება 98.3 მილიონი ევროა. „კვარაზე“ ძვირად CIES-მა სერია A-ში მოთამაშე მხოლოდ ერთი ფეხბურთელი შეაფასა და რაფაელ ლეაუ გამოარჩია, ვისი ფასიც 101.5 მილიონი ევროა. კვარაცხელიას თანაგუნდელის, ვიქტორ ოსიმენის სატრანსფერო ღირებულება 85.6 მილიონი ევროა, გიორგი მამარდაშვილი კი ტოპ 100-ში ვერ მოხვდა.

CIES-ის რეიტინგში პირველ ადგილს ჯუდ ბელინგემი იკავებს - 280.4 მილიონი ევრო. მეორე პოზიციაზე ერლინგ ჰოლანდს ვხედავთ - 255.3 მილიონი, ვინისიუს ჟუნიორი მესამეა - 240.8 მილიონი, როდრიგო გოეში - მეოთხე (220.7 მილიონი), ხოლო ხუთეულს ფილ ფოდენი ასრულებს - 203.8 მილიონი.

ცნობისთვის, Transfermarkt-ზე კვარაცხელიას ფასი 80 მილიონი ევროა. ის სერია A-ში მეოთხე ყველაზე ძვირადღირებული ფეხბურთელია და მხოლოდ ვიქტორ ოსიმენს, ლაუტარო მარტინესსა და რაფაელ ლეაუს ჩამორჩება. მარცხენა გარემარბის პოზიციაზე კი, მსოფლიოს მასშტაბით, მასზე წინ მხოლოდ ლეაუ და ვინისიუსი არიან.