„მოუთმენლად ველოდები გამოწვევას“ - კომპანიმ ბაიერნი ჩაიბარა
38 წლის ბელგიელი სპეციალისტი ვენსან კომპანი მიუნხენის „ბაიერნის“ მთავარ მწვრთნელად დაინიშნა. ინფორმაცია მიუნხენური კლუბის ოფიციალურმა გვერდმაც დაადასტურა.
კომპანი „რეკორდმაისტერს“ 2027 წლის 30 ივნისამდე უხელმძღვანელებს.
ბელგიელმა „ბაიერნის“ მწვრთნელის რანგში პირველი კომენტარიც გააკეთა.
Vincent Kompany is the new head coach of FC Bayern, putting pen to paper on a deal until 2027 ????⚪#MiaSanMia pic.twitter.com/XHQs4mmOUw
— FC Bayern Munich (@FCBayernEN) May 29, 2024
„მოუთმენლად ველოდები გამოწვევას, რომელიც ბაიერნში მუშაობას მოჰყვება. ჩემთვის დიდი პატივია ამ კლუბში მუშაობა. ბაიერნი საერთაშორისო ფეხბურთის ინსტიტუტია.
როგორც მწვრთნელმა უნდა დაამტკიცო თუ ვინ ხარ და რას წარმოადგენ. მომწონს, როცა გუნდი ბურთს აკონტროლებს, კრეატიულად, აგრესიულად და თამამად თამაშობს.
ახლა ყველაზე ძირითადი რამ უნდა გავაკეთო: ფეხბურთელებთან მუშაობა, გუნდის შექმნა. როგორც კი საფუძველი ჩაეყრება, წარმატება მოვა“,
- განაცხადა ბელგიელმა.
შეგახსენებთ, რომ კომპანი 2022-2024 წლებში „ბარნლიში“ მუშაობდა. პრემიერ ლიგის უკვე დასრულებულ სეზონში „ბარნლიმ“ მე-19 ადგილი დაიკავა და ჩემპიონშიფში გავარდა.
