კროოსი: “განსაკუთრებული მადლობა მადრიდისტებო“
სულ ცოტა ხნის წინ, ცნობილი გახდა, რომ ტონი კროოსი ევრო 2024-ის დასრულების შემდეგ, საფეხბურთო კარიერას დაასრულებს. ეს ინფორმაცია მადრიდის რეალის ოფიციალურმა გვერდმა დაადასტურა.
ლეგენდარულმა გერმანელმა გულშემატკივრებს და სამეფო კლუბს „ინსტაგრამის“ საკუთარი გვერდის საშუალებით მიმართა.
რას წერს ტონი?
„2014 წლის 17 ივლისი - მადრიდის რეალში ჩემი პრეზენტაციის დღე! დღე, რომელმაც ჩემი ცხოვრება შეცვალა. შეიცვალა, როგორც ფეხბურთელისთვის, ასევე ადამიანისთვის. ეს ცხოვრების ახალი ეტაპის დასაწყისი იყო მსოფლიოს უდიდეს კლუბში. 10 წლის შემდეგ, ეს ისტორია მთავრდება. არასდროს დამავიწყდება ეს თავხედური წარმატებული დრო!
განსაკუთრებული მადლობა მინდა გადავუხადო ყველას, ვინც წრფელი გულით მიმიღო და მენდო. ასევე განსაკუთრებული მადლობა მინდა გადაგიხადოთ თქვენ ძვირფასო მადრიდისტებო. თქვენი სიყვარულისთვის პირველი დღიდან ბოლო დღემდე. ამავდროულად, ეს გადაწყვეტილება ნიშნავს, რომ ჩემი, როგორც აქტიური ფეხბურთელის კარიერა ამ ზაფხულს ევროპის ჩემპიონატის შემდეგ დასრულდება.
როგორც ვამბობდი: რეალი არის და იქნება ჩემი ბოლო კლუბი. ბედნიერი და ამაყი ვარ, რომ ჩემს გონებაში ვიპოვე სწორი დრო ჩემი გადაწყვეტილების მისაღებად და რომ შემეძლო მისი არჩევა ჩემით. ყოველთვის მქონდა ამბიცია, რომ კარიერა ფორმის პიკში დამესრულებინა. ამ მომენტიდან მხოლოდ ერთი აზრი მიტრიალებს თავში: a por la 15!!! HALA MADRID Y NADA MAS!“
View this post on Instagram
შეგახსენებთ, რომ გერმანელი ფეხბურთელი „სამეფო კლუბს“ 2014 წელს შეუერთდა. დღემდე ყველა ტურნირზე ერთად 463 მატჩში მიიღო მონაწილეობა, 28 გოლი გაიტანა და 98 საგოლე გადაცემა შეასრულა.
კროოსი მადრიდის რეალის მაისურით ბოლო მატჩს ჩემპიონთა ლიგის ფინალში დორტმუნდის წინააღმდეგ ჩაატარებს.
10-წლიან მადრიდულ კარიერაში კროოსმა 4 ლა ლიგა, ერთი კოპა დელ რეი, 4 ესპანეთის სუპერ თასი, 4 ჩემპიონთა ლიგა, 3 უეფა-ს სუპერ თასი და 5 მსოფლიო საკლუბო ჩემპიონატი მოიგო.
