„ძალიან მალე მნიშვნელოვანი ფეხბურთელი გახდება“ - ემპოლის მწვრთნელი გოგლიჩიძეზე

„ემპოლის“ მთავარმა მწვრთნელმა, დავიდე ნიკოლა სერია A-ს ბოლო ტურში, „ლაციოსთან“ 0:2 მარცხის შემდეგ საბა გოგლიჩიძის შესახებ ისაუბრა და მიგვანიშნა, რომ ქართველი მცველი სათამაშო დროს დიდი ალბათობით მალე მიიღებს.

რას ამბობს დავიდე ნიკოლა:

„ჩვენი გუნდის ახალწვეული საბა გოგლიჩიძე, რომელიც იანვარში დავიმატეთ, პროფესიონალი სპორტსმენი და კარგი ადამიანია. მას ყველანაირი მონაცემი აქვს, რომ მაღალ დონეზე ითამაშოს, ძალიან ახალგაზრდაა და განსხვავებული გამოცდილება აქვს. წარმოიდგინეთ, საქართველოდან „ემპოლიმდე“ რა გზა გაიარა, ენის სწავლა და გუნდთან ინტეგრირება სჭირდება. რაც მთავარია, ძალიან მონდომებულია, რომ მაღალ დონეზე ითამაშოს“.

„ლაციოსთან“ მსურდა, რომ საბას ეთამაშა, სხვა შედეგი რომ ყოფილიყო, ალბათ მოედანზე შევუშვებდი. მიმაჩნია, რომ მომავალში ის „ემპოლისთვის“ მნიშვნელოვანი ფეხბურთელი გახდება“.

საბა გოგლიჩიძე „ემპოლის“ მიმდინარე წლის იანვრის სატრანსფერო ფანჯარაზე, ქუთაისის „ტორპედოდან“ შეუერთდა, თუმცა, ახალგაზრდა მცველს იტალიურ გუნდში თავის გამოჩენის შესაძლებლობა ჯერჯერობით, არ მისცემია.

„ემპოლი“ მიმდინარე სეზონში სერია A-ში ადგილის შენარჩუნებისთვის იბრძვის. დავიდე ნიკოლას გუნდი 36 ქულით მე-17 პოზიციაზე იმყოფება და მე-18 ადგილოსან „უდინეზეს“, რომელსაც ერთით ნაკლები შეხვედრა აქვს გამართული, 2 ქულით უსწრებს. „ემპოლი“ მომდევნო მატჩს 19 მაისს სწორედ „უდინეზეს“ წინააღმდეგ გამართავს და გამარჯვების შემთხვევაში, სერია A-ში დარჩენისკენ უდიდეს ნაბიჯს გადადგამს.