„ერთიანობის და სიხარულის განცდა არ ნელდება“ - არველაძე ნაკრების წარმატებაზე
საქართველოს ფეხბურთელთა ნაკრების ისტორიულ წარმატებას ეროვნული გუნდის ყველა დროის საუკეთესო ბომბარდირი შოთა არველაძე კიდევ ერთხელ, ამჯერად Facebook-გვერდის საშუალებით გამოეხმაურა და მიღწეულის მნიშვნელობას ხაზი გაუსვა.
არველაძე სიხარულით აღნიშნავს იმ ფაქტს, რომ რამდენიმე დღის შემდეგაც არ ნელდება იმ ერთიანობისა და სიხარულის განცდა, რაც საქართველოს ნაკრების წარმატებამ განაპირობა. შოთამ გაიხსენა, რომ მათ თაობასაც ბევრჯერ გაუხარებია გულშემატკივარი, თუმცა ამ წარმატებასთან იმის შედარება არცკი შეიძლება. ეროვნული ნაკრების საუკეთესო ბომბარდირი თვლის, რომ 26 მარტს მიღწეული შედეგი ქართული ფეხბურთის შემოტრიალების წერტილად უნდა მოინიშნოს და მხოლოდ ლამაზ მოგონებად არ უნდა დარჩეს.
მან ასევე პირადად მიულოცა საქართველოს ფეხბურთის ფედერაციის პრეზიდენტსა და ვიცე-პრეზიდენტს, ლევან კობიაშვილსა და ალექსანდრე იაშვილს, რომელთათვისაც ეს ფინალი და მთელი განვლილი გზა ძალიან ბევრს ნიშნავდა.
რას წერს არველაძე:
რამდენიმე დღის შემდეგაც, არ ნელდება იმ ერთიანობის და სიხარულის განცდა, რომელიც ეროვნული ნაკრების წარმატებამ განაპირობა. ფეხბურთში ბევრის მნახველ ადამიანებს თითქოს ემოციები ისე მძაფრად აღარ უმუშავებთ, როგორც გულშემატკივრობის თუ თამაშის პირველ პერიოდში. ჩვენც ბევრი გვინახავს, ბევრჯერ გაგვიხარებია გულშემატკივარი და ბევრჯერ გვიგრძვნია ეროვნული ნაკრების მაისურით თამაშის პასუხისმგებლობა, მაგრამ ის, რასაც ჩვენმა გუნდმა მიაღწია, არაფერს ჰგავს.
ევროპის ჩემპიონატის პირველ მატჩამდე, ყოველი დილა და ღამე იმის ფიქრით დაიწყება და დამთავრდება, როგორი იქნება ჩვენი პირველი მოგზაურობა, ემოციები და დიდი საფეხბურთო ფორუმი, საყვარელ გუნდთან ერთად. ეს გამარჯვება მხოლოდ მოგონებად და ლამაზ თარიღად არ უნდა დარჩეს. ვფიქრობ, ეს მომენტი ყველამ უნდა გამოვიყენოთ, გადავაფასოთ მიმდინარე თუ წარსულში მომხდარი ამბები, 26 მარტი შემოტრიალების წერტილად უნდა მოვნიშნოთ, ყველგან და ყველასთან, სადაც რესურსი და სურვილია, ეს ენერგია ერთობისკენ მივმართოთ. გუნდთან ერთად, მინდა კობის და იაშკას პირადად მივულოცო ეს წარმატება. ვიცი, რამდენს ნიშნავდა მათთვის ფინალი, ეს პერიოდი და მთელი ის გზა, რომელიც ამ წარმატებამდე გაიარეს.
ამასთან ერთად, ძალიან მნიშვნელოვანია, რომ ახალი თაობა, მოზარდები, მომავალი ფეხბურთელები უკვე გამარჯვებულ საქართველოში იღვიძებენ. ისტორიები, რომელსაც ისმენდნენ აღარ დაუკავშირდება მხოლოდ წარსულს და უკვე ჰყავთ ამ ამბის შემოქმედი, მისაბაძი ფეხბურთელები და გუნდი, ვის მაგალითზეც ხვალ გაიზრდებიან.
ახალი კვირა, ახალი თვე და 74 დღე ევროპის ჩემპიონატამდე! მე ვარ საქართველო!
26 გოლით შოთა არველაძე დღემდე საქართველოს ნაკრების ყველა დროის საუკეთესო ბომბარდირია და მეორეადგილოსან თემურ ქეცბაიას ცხრა, მესამე პოზიციაზე მყოფ ხვიჩა კვარაცხელიას კი 11 ბურთით უსწრებს.
