სანიოლი ირლანდიის ნაკრებში? რას წერს ბრიტანული მედია

ვილი სანიოლი შესაძლოა ირლანდიის ფეხბურთელთა ნაკრების მთავარ მწვრთნელად დაინიშნოს. ამის შესახებ ინფორმაციას THE SUN-ის ირლანდიური გამოცემა ავრცელებს.

რამდენიმე კვირის წინ ამ თანამდებობაზე „მანჩესტერის“ ყოფილი ფეხბურთელი ჯონ ო’ში დაინიშნა, თუმცა იქიდან გამომდინარე, რომ მას სამწვრთნელო გამოცდილება არ აქვს, ირლანდიის ფეხბურთის ფედერაციის ხელმძღვანელები ო’შის ვარიანტს დროებითად მიიჩნევენ.

გავრცელებული ინფორმაციით, სანიოლს უკვე დაუკავშირდა ირლანდიის საფეხბურთო ასოციაციის დირექტორი მარკ კენემი და მოლაპარაკებები დაიწყო. მისი სურვილია, რომ ფრანგთან შეთანხმებას აპრილისთვის მიაღწიოს, წინააღმდეგ შემთხვევაში კი დროებით მწვრთნელად ლი კარსლის დანიშნავს, რომელიც ახალგაზრდულ ნაკრებს ამზადებს.

ვილი სანიოლი საქართველოს ნაკრებს 2021 წლის 15 თებერვლიდან ხელმძღვანელობს და მისი მწვრთნელობის პერიოდში გამართული 31 მატჩიდან გუნდმა 14 მოიგო, 5 ფრედ დაასრულა და 12 წააგო. ფრანგმა სპეციალისტმა ცოტა ხნის წინ განაცხადა, რომ ევროპის ჩემპიონატის დასრულების შემდეგ დიდი ალბათობით საქართველოს ნაკრებს დატოვებს.

21 მარტს ფრანგს მის სამწვრთნელო კარიერაში ერთ-ერთი ყველაზე საპასუხისმგებლო მატჩი ელის - „დინამო არენაზე“ ქართველი ფეხბურთელები უეფას ერთა ლიგის ნახევარფინალში ლუქსემბურგის ნაკრებს უმასპინძლებენ.