ბითაძეს მატჩის ბოლოს 3 წუთი მისცეს | ორლანდო მაიამისთან განადგურდა

გოგა ბითაძის „ორლანდო მეჯიქი“ ფლორიდულ დერბიში განადგურდა. ქართველი კალათბურთელის გუნდი „მაიამი ჰიტს“ სტუმრად დაუპირისპირდა და ერთ-ერთი კონკურენტის წინააღმდეგ ვერაფერი გააწყო. „მაიამიმ“ გადამწყვეტი უპირატესობა მესამე მეოთხედში მოიპოვა, რომელიც 40:26 მოიგო და საბოლოოდ, 121:95 იმარჯვა.

შეხვედრის დასრულებამდე 3 წუთითა და 7 წამით ადრე, როცა „ორლანდო“ 93:117-ს აგებდა, „მეჯიქის“ თავკაცმა, ჯამალ მოზლიმ ბითაძე პარკეტზე შეუშვა. ქართველმა კალათბურთელმა 3 წუთში 1 მოხსნისა და 1 შედეგიანი გადაცემის გაკეთება მოასწრო. ბითაძეს მეტოქის კალათისთვის არ შეუტევია და 1 დაკარგვა ჰქონდა.

„ორლანდოს“ მაისურით ყველაზე მეტი ქულა პაოლო ბანკერომ დააგროვა და მატჩი 23 ქულით, 9 მოხსნითა და 7 ასისტით დაასრულა. უენდელ კარტერ ჯუნიორს 15 ქულა და 6 მოხსნა ჰქონდა, მარკელ ფულტცმა და ფრანც ვაგნერმა 13-13 ქულა მიითვალეს. „მაიამის“ რიგებში საუკეთესო ჯიმი ბატლერი იყო - 23 ქულა, 8 მოხსნა, 8 ასისტი. ტერი როზიერმა 18 ქულა ჩააგდო, ბემ ადებაიომ და ტაილერ ჰირომ 14-14 ქულა გააკეთეს.

ცნობისთვის, „ორლანდოს“ 27 მოგება და 24 წაგება აქვს და აღმოსავლეთ კონფერენციაში მე-7 გახლავთ. „მეჯიქი“ მომდევნო შეხვედრას 9 თებერვალს გამართავს და საკუთარ კედლებში სანდრო მამუკელაშვილის „სან ანტონიო სპურსს“ დაუპირისპირდება.