ეს ბრწყინვალე ინდიკატორია - ძოლამ კვარა კიდევ ერთხელ შეაქო

ვეტერანმა ფეხბურთელმა ჯანფრანკო ძოლამ „ნაპოლის’’ ოფიციალურ რადიოსთან, Kiss Kiss Napoli-სთან გადაცემა Radio Goal-ში ხვიჩა კვარაცხელიაზე ისაუბრა. „ჩელსის’’ ლეგენდამ კვარაცხელია „ჰელას ვერონასთან'' ბრწყინვალე გოლის გამო შეაქო.

„კვარაცხელიას გოლი? ჩემზე დიდი შთაბეჭდილება მოახდინა, ბურთი გააკონტროლა და დაარტყა. ეს შესანიშნავი ინდიკატორია თუ რამდენად ნიჭიერია. ვიდრე ბურთს მიიღებდა, იცოდა თუ რა უნდა გაეკეთებინა.

გასულ წელს საოცარი რაღაცები გააკეთა როგორც მან, ასევე მთელმა გუნდმა. საწყისი სირთულეების შემდეგ ფორმაში შედის, სკუდეტოს მოგების შემდეგ სირთულეები მოსალოდნელი იყო. ახლა პოულობს სწორ ტემპს და გუნდისთვის მნიშვნელოვან რაღაცებს აკეთებს. მისით ბედნიერი ვარ, ძალიან კარგი ბიჭია’’.

შეგახსენებთ, სერია ა-ს გასულ ტურში კვარაცხელიას ბრწყინვალე გოლით „ნაპოლიმ'' „ჰელას ვერონა'' დაამარცხა. 

სერია ა-ს მიმდინარე სეზონში ხვიჩა კვარაცხელიამ 18 მატჩში 6 გოლი შეაგდო და 3 საგოლე პასი შეასრულა.

La Repubblica-ს ცნობით, სეზონის დასრულების შემდეგ „ნაპოლი'' კვარაცხელიას ახალ კონტრაქტს გაუფორმებს. „დე ლაურენტისი მზადაა, დააჯილდოოს კონტრაქტითა და ხელფასით, რომელსაც იმსახურებს“ - წერს იტალიური გამოცემა.