სლავებს შორის ასეთი რამ არ უნდა ხდებოდეს - დემეტრაძე რუსულ ინტერვენციაზე

საქართველოს ეროვნული ნაკრების ყოფილი ფეხბურთელი გიორგი დემეტრაძე რუსულ Championat.com-ს ბევრ თემაზე ესაუბრა, მათ შორის საბა საზონოვისა და კონსტანტინე მარადიშვილის საქართველოს ნაკრებში თამაშის საკითხზე (იხილეთ). ინტერვიუს გარკვეული ნაწილი არასაფეხბურთო თემებს ეხება, რომელსაც უცვლელად გთავაზობთ.

- რას საქმიანობდი კარიერის დასრულების შემდეგ?

- საქართველოს ფეხბურთის ფედერაციაში ვმუშაობდი.

- Wikipedia-ში წერია, რომ ჯერ კიდევ ქუთაისის „ტორპედოს’’ პრეზიდენტი ხარ. ეს ძველი ინფორმაციაა?

- არა, არა, ეს ალბათ 1945 წელს იყო, დიდი ხნის წინ.

- რითი ცხოვრობ?

- რაღაც იყო, რაღაც არის. ჯერ საწუწუნო არაფერი მაქვს, ყველაფერი ნორმალურადაა.

- ფეხბურთელის კარიერიდან გამომუშავებული თანხის დანაზოგი გაქვს?

- რა თქმა უნდა ცოტა დანაზოგი მაქვს.

- კახა კალაძე დიდი ადამიანია ახლა?

- რა თქმა უნდა, ის დედაქალაქის მერია.

- არ შეგიძლია მისი ახლოს ნახვა?

- კახა პატიოსანი პიროვნებაა, ის ყველას ხვდება. ისტორიაში თბილისის საუკეთესო მერია.

- ვისი ვერსიით?

- ასეა თბილისის მოსახლეობის აზრით. რეიტინგებში ყოველთვის პირველ ადგილზეა.

- ბოლო ორ წელში თბილისში ბევრი რუსი იმყოფებოდა?

- ძალიან ბევრი. ძირითადად, ბათუმსა და თბილისში.

- როგორი დამოკიდებულება აქვთ ადგილობრივებს ჩამოსულების მიმართ?

- ნორმალური, სერიოზული ინციდენტი არ ყოფილა, აქ ძალიან ბევრი რუსი და უკრაინელია, ისინი ერთად მშვენივრად ცხოვრობენ.

- შენ თანაბრად ღელავ რუსებსა და უკრაინელებზე. არის იმედი რომ ყველაფერი მალე დასრულდება?

- ჩემთვის ამ თემაზე საუბარი ძალიან მტკივნეულია. პოლიტიკისგან შორს ვარ, მაგრამ სლავებს შორის ასეთი რამ არ უნდა ხდებოდეს, ეს ნონსენსია. დაე, მსოფლიოში მშვიდობა იყოს.