კვარა ინტერთან თადარიგში დარჩება? რას წერს იტალიური გამოცემა

ორშაბათს საუდის არაბეთში იტალიის სუპერ თასის ფინალი გაიმართება. „ნაპოლი“ „ინტერს“ დაუპირისპირდება. შესაძლოა შეხვედრა თადარიგიდან დაიწყოს ხვიჩა კვარაცხელიამ, რომელსაც იტალიური Il Mattino „გადაღლილს“ უწოდებს.

Il Mattino წერს, რომ ხვიჩა „ფიორენტინასთან“ შეხვედრაში ზედმეტად გადაღლილი მოჩანდა, მაცარიმ მისი შეცვლა და დასვენება გადაწყვიტა, თუმცა იტალიური გამოცემა მეტსაც წერს და ამბობს, რომ ქართველმა შესაძლოა ფინალი სათადარიგოთა სკამიდან დაიწყოს და შეხვედრაში მეორე ტაიმიდან ჩაერთოს.

ხვიჩას ჩანაცვლების ნომერ პირველ კანდიდატად ჯაკომო რასპადორი ითვლება.

ვალტერ მაცარიმ სათამაშო სქემა შეცვალა და გუნდი 3-4-2-1-ზე გადააწყო. მთავარი მწვრთნელის თქმით, მას არ სურს, რომ ხვიჩამ დაცვაში ზედმეტად იმუშაოს. მისი გეგმაა, რომ ქართველმა მეტი დრო და ენერგია შეტევას მოახმაროს.

რა გადაწყვეტილებას მიიღებს მაცარი და გამართლდება, თუ არა Il Mattino-ს ვარაუდი, ამას ორშაბათს 23:00 საათზე გავიგებთ, როცა ფინალური შეხვედრა დაიწყება.