„სალერნიტანასთან ნამდვილი კვარაცხელია ვნახე“ - ფაბიო კაპელო

ლეგენდარულმა იტალიელმა მწვრთნელმა, ფაბიო კაპელომ ლა la Gazzetta dello Sport-თან ინტერვიუს დროს „ნაპოლის“ შესახებ ისაუბრა და „სალერნიტანასთან“ მატჩში ხვიჩა კვარაცხელიას თამაში გამოარჩია.

რა თქვა კაპელომ:

მგონია, რომ „ნაპოლი“ კვლავ პრობლემურ ფაზაშია. მაცარი გუნდში ცოტა ხნის წინ მოვიდა და თავიდანვე ნათელი იყო, რომ გარსიას შემდეგ განხორციელებულ ცვლილებებს სირთულეები მოჰყვებოდა. ბოლო მატჩში, დადებითი რაც ვნახე, ხვიჩა კვარაცხელიას თამაში იყო. დასკვნით 20 წუთში ნამდვილი კვარაცხელია დავინახე, ბიჭი, რომელსაც შეზღუდულ ზონებში დრიბლინგი, მეტოქის მოტყუება და კარში დარტყმა შეუძლია. არ უნდა დაგვავიწყდეს, რომ გუნდს ოსიმენი არ ჰყავს, რომელიც დიდი ძალაა. ხომ ნახეთ, როგორ თამაშობდა „ინტერი“ ლაუტაროს გარეშე?

შეგახსენებთ, რომ სერია A-ს ბოლო ტურში „ნაპოლიმ“ საკუთარ მოედანზე „სალერნიტანა“ 2:1 დაამარცხა. ხვიჩა კვარაცხელიას შედეგიანი მოქმედება (გოლი; საგოლე პასი) არ ჰქონია, თუმცა, გულშემატკივრებმა მატჩის საუკეთესო მოთამაშედ დაასახელეს. 20 ტურის შემდეგ, „ნაპოლი“ სერია A-ს სატურნირო ცხრილში 31 ქულით მე-8 ადგილზე იმყოფება.