ჩავი: “კმაყოფილი ვარ იმ ფეხბურთელებით, რომლებიც მყავს“
ლა ლიგის მორიგ ტურში „ბარსელონა“ „ლას პალმასს“ ესტუმრება. როგორც წესი, მატჩის წინ ჩავი ერნანდესმა ჟურნალისტებთან ისაუბრა.
ესპანელ სპეციალისტს ჟურნალისტებმა კილიან მბაპესა და ერლინგ ჰოლანდის შესაძლო ტრანსფერზე ჰკითხეს, რაზეც ჩავიმ უპასუხა:
„ჰოლანდი, თუ მბაპე? ჩვენ ახლა არ ვფიქრობთ იმაზე, რომ რომელიმე მათგანი შესაძლოა „ბარსელონას“ შეუერთდეს. სამწუხაროდ, ამ ფეხბურთელების შეძენა არ შეგვიძლია. კმაყოფილი ვარ იმ ფეხბურთელებით, რომელიც მყავს. ვფიქრობ, საუკეთესო დონეს უნდა მივაღწიოთ. „ბარსელონა“ ყოველთვის მაღალ დონეზე უნდა იყოს.“
შეგახსენებთ, რომ მიმდინარე სეზონში კატალონიური გრანდი დამაჯერებელი არ არის. ლა ლიგაში „ბლაუგრანა“ ლიდერ მადრიდის „რეალს“ 7 ქულით ჩამორჩება.
განსხვავებით ლა ლიგისგან, ბარსა ჩემპიონთა ლიგაზე უკეთ გამოიყურებოდა და ჯგუფში პირველი ადგილი დაიკავა. მერვედფინალში კი ხვიჩა კვარაცხელიას „ნაპოლის“ დაუპირისპირდება.
