მამუკელაშვილმა 2 წუთი ითამაშა | სან ანტონიომ იუტასთან წააგო

სანდრო მამუკელაშვილის „სან ანტონიო სპურსის“ წარუმატებელი სერია გრძელდება. ქართველი კალათბურთელის გუნდმა ზედიზედ მეხუთე შეხვედრა წააგო და საკუთარ კედლებში, „იუტა ჯაზთან“ დამარცხდა - 118:130.

„სპურსმა“ მატჩი კარგად დაიწყო და პირველი მეოთხედი 5 ქულით მოიგო, თუმცა, დარჩენილ სამ პერიოდში „ჯაზმენებს“ ვერაფერი დაუპირისპირა. „იუტამ“ პირველ ნახევარში 64:60 იმარჯვა, მესამე და მეოთხე მეოთხედებში კი თამაშს აკონტროლებდა და საქმე ბოლომდე მიიყვანა.

სანდროს სათამაშო დრო მაშინ მისცეს, როცა გამარჯვებულის ბედი გადაწყვეტილი იყო. „მამუმ“ პარკეტზე 2 წუთზე ოდნავ მეტი გაატარა და 1 მოხსნას დასჯერდა. მამუკელაშვილმა 1 ორქულიანი ისროლა, მაგრამ მისი ტყორცნა არაზუსტი აღმოჩნდა.

„სან ანტონიოს“ რიგებში ყველაზე მეტი, 26 ქულა კელდონ ჯონსონის ანგარიშზეა. დევინ ვესელს 22 ქულა და 3 ჩაჭრა ჰქონდა. ჯერემი სოხანმა 19 ქულა დააგროვა, ვიქტორ ვემბანიამას მონაგარი 15 ქულა და 7 მოხსნაა. „იუტას“ ლაური მარკანენმა ულიდერა - 31 ქულა, 12 მოხსნა. ჯორდან კლარკსონს 24 ქულა და 8 ასისტი ჰქონდა, კოლინ სექსტონმა 20 ქულა დააგროვა.

ამრიგად, „სან ანტონიოს“ 4 მოგება და 25 წაგება აქვს და დასავლეთ კონფერენციაში ბოლო გახლავთ. „სპურსის“ მომდევნო გაჩერება „პორტლენდ ტრეილ ბლეიზერსია“, რომელსაც 29 დეკემბერს სტუმრად დაუპირისპირდება.