სეზონის საუკეთესო გოლი! - ხვიჩას მორიგი აღიარება იტალიაში

იტალიის ქალაქ მილანში Gran Gala De Calcio-ს 2023 წლის დაჯილდოება მიმდინარეობს, სადაც სხვადასხვა ნომინაციებში, სერია A-ს გასული სეზონის საუკეთესო ფეხბურთელებს აჯილდოებენ.

სასიხარულოა, რომ ღონისძიებაში მონაწილეობას „ნაპოლისა“ და საქართველოს ნაკრების ქართველი შემტევი, ხვიჩა კვარაცხელიაც იღებს და ცოტა ხნის წინ, 22 წლის ფეხბურთელი ერთ-ერთი ნომინაციის გამარჯვებული გახდა.

ორგანიზატორების ვერსიით, ხვიჩა კვარაცხელია სერია A-ს 2022/23 წლების სეზონის საუკეთესო გოლის ავტორი გახდა. ღონისძიებაზე 2023 წლის 11 მარტს, სერია A-ს 26-ე ტურში გასული გოლი გამოარჩიეს, რომელიც ხვიჩამ „ატალანტას“ გაუტანა.

ქართველ ფეხბურთელს კუთვნილი ჯილდო ვეტერანმა იტალიელმა ფეხბურთელმა, ფაბიო კუალიარელამ გადასცა.

შეგახსენებთ, რომ გასულ სეზონში, ხვიჩა კვარაცხელიამ „ნაპოლის“ მაისურით სერია A-ში 12 გოლი გაიტანა და 11 საგოლე გადაცემა შეასრულა, სეზონის ბოლოს კი იტალიის ჩემპიონატის საუკეთესო ფეხბურთელად დასახელდა.