„ნაპოლი კონტრშეტევებზე სახიფათოა“ | რა თქვა ანჩელოტიმ მომდევნო მეტოქეზე
ჩემპიონთა ლიგის ჯგუფური ეტაპის მე-5 ტურში, ხვიჩა კვარაცხელიას „ნაპოლი“ სტუმრად „რეალს“ დაუპირისპირდება. „სამეფო კლუბის“ მთავარმა მწვრთნელმა, კარლო ანჩელოტიმ მატჩისწინა პრესკონფერენცია გამართა და იტალიელ სპეციალისტს თან დანი კარვახალი ახლდა.
დანი კარვახალი: „ნაპოლი შესანიშნავი გუნდია და მთლიანად ხვალინდელ შეხვედრაზე ვართ ფოკუსირებული. ანჩელოტი? კარლომ გამაოცა. ის საკუთარი იდეების ხელახლა გამოგონებასა და მატჩების ანალიზს არ წყვეტს. პირადად მე, მიმაჩნია, რომ ის გუნდში იმდენ ხანს დარჩება, რამდენსაც მოისურვებს. რეალმა საერთოდ ვერაფერი რომ ვერ მოიგოს, ანჩელოტის კონტრაქტს მაინც ხვალვე გავუხანგრძლივებდი.
როგორ ვხვდები ხვალინდელ მატჩს და როგორ ხვდება რეალი? სტატისტიკის კუთხით, პრობლემები არ მაქვს და თავდაჯერებული ვარ. ისეთი ბრწყინვალე მეტოქის წინააღმდეგ ვითამაშებ, როგორიც კვარაა და ვნახოთ, რა მოხდება“.
კარლო ანჩელოტი: „ხვალინდელი შეხვედრა ძალიან მნიშვნელოვანია. შანსი გვაქვს, ჯგუფური ეტაპი პირველ ადგილზე დავასრულოთ და გვინდა, საუკეთესო მატჩი ჩავატაროთ. ჩვენი საკადრო პრობლემები? ჩემი აზრით, ამაზე საუბარი იმ ფეხბურთელთა უპატივცემულობაა, რომლებიც მოედანზე იქნებიან. საჭიროა იმაზე ვიფიქროთ, რაც გვაქვს და არა იმაზე, რაც გვაკლია. თუ ასეთი დანაკლისის ფონზე, მაინც მაღალ დონეზე ვითამაშებთ, ეს დაადასტურებს, რომ ძალიან კარგი შემადგენლობა გვყავს.
გამიკვირდა თუ არა ვალტერ მაცარის დანიშვნა? მაცარი იტალიურ ფეხბურთს ძალიან კარგად იცნობს და შესანიშნავი მეგობრები ვართ. ახალი თავკაცის ფაქტორი დამატებით მოტივაციას გვძენს. ატალანტასთან მატჩმა გვანახა, რომ ნაპოლი მოტივირებულია და მაცარის გუნდისთვის გამოცდილება და ცოდნა მოაქვს. არის თუ არა ეს პირადი შურისძიება ნაპოლიზე? ნეაპოლში ბრწყინვალე დრო გავატარე და არანაირ შურისძიებას ადგილი არ აქვს.
როგორი თამაში იქნება? პირველი მატჩი თანაბარი იყო და ხვალინდელ შეხვედრაშიც იმავეს ველოდებით. ნაპოლის კონტრშეტევები ძალიან სახიფათოა, განსაკუთრებით, ოსიმენთან და კვარასთან ერთად და ამაზე ყურადღება აუცილებლად უნდა გავამახვილოთ”.
შეგახსენებთ, რომ „ნაპოლისა“ და „რეალის“ დაპირისპირება 29 ნოემბერს გაიმართება და თბილისის დროით, 23:59-ზე დაიწყება.
